ZPM chuan Assam sorkarin Mizoram chu a theih dan kawng zawng zawngin min hrek mek tih sawiin, ruihhlo leh smuggling-a sumdawngah hial min puh a ni an ti.
July 26-a state pahnih police-te inkahna denchhena thubuai ziahluhte Mizoram sorkarin a hnuhkir vek hnuah Assam sorkar chuan a hnukkir kim ve duh lo bawk a. Aitlang leh Buarchep a Assam Police post thiah a la ni lo a. Mizorama zin lo tura Travel Advisory an chhuah te, lirthei special checking nei tura thu an chhuah te sut a la ni lo a. Hengte avang hian, ramri chungchangah emaw, July 26-a indona kaihhnawihah emaw inremna kawng zawngin kan inbe dawn a nih chuan, kawngpui danga inhrekna leh dawta inpuhnate hi Assam sorkar hian a sut hmasa phawt turah ZPM chuan kan ngai a ni an ti.
Hripui vanga harsatna vawrtawp a thlen mek laia damdawi phur motor lehzel Assam sorkarin a hrek duh hian Mizoram mipuite laka Assam sorkar rilru a tarlang chiang viauah ZPM chuan an ngai a. Hripui leh natna benvawn neite nunnain a tawrh lohna turin, damdawi leh bungraw mamawh hmanhmawh zual chu Mizoram sorkarin thlawhtheihna hmang a la lut mai turin ZPM chuan Mizoram sawrkar a ngen an ni.
ZPM chuan Central leh Assam state-a BJP sorkarin heti taka Mizoram a diriam takah chuan, Mizorama ruling MNF party pawhin NEDA leh NDA a zawmna hian awmzia a nei tawh lo tih hriain, an inhnukdawk ngam turah ZPM chuan a ngai a ni an ti.
Post a Comment