Premier League champion Manchester City chuan Aston Villa captain Jack Grealish chu an lalut dawn ta a, vawiinah medical a nei ang a, Manchester City player a ni tawh ang.
Manchetster City neitupa, Arab pa hausa Khaldoon Al Mubarak-a hian Premier League-a champion mai duh tawk lovin, Europe thlenga team tha din a tum chho mek a, chumi atan chuan England playmaker Jack Grealish hi a mi duh ber te zing a mi a ni. Jack Grealish mai bakah City hian England Captain Harry Kane chu lakluh an la tum cheu a, indawrna a kal mek a ni.
Manchester City hian Jack Grealish hi British Transfer Record £100m in an lalut dawn a, hei hian record ding lai, kum 2016 a Manchester United-in Juventus atanga Paul Pogba an lakluhna zat £93.25m chu a khum dawn chiang a ni.
Jack Grealish hian kum 6 a nihin Aston Villa Academy a zawm a, Notts County lamah in chher hriam tura tirh a nih hnuin kum 2014 khan Aston Villa-ah a kir leh a, hemi kum hian PL-a a match hmasa ber chu Manchester City an hneh loh tumin a khel a, Ryan Bertrand a rawn thlak. Aston Villa tan hian vawi 185 a inlan hman a, goal 29 a thun tawh bawk.
Jack Grealish hi England a piang nimahse ram tan age level-ah Rep. of Ireland tan U-17 atanga U-21 thleng khan a khel a, kum 2016 khan England senior tan a inlan tan a, Three Lions tan hian vawi 12 a inlan tawh a ni.
Euro 2020 ah khan Grealish hi England tan minute 137 chiah a inlan a, a inlan chhung reilo hle mahse England tlarhma tichaktu leh Game thlak danglamtu a nih zia kan hmu vek a ni.
Aston Villa hian an captain an chan dawn takah chuan a thlaktu atan Norwich Plamaker Todd Cantwell chu lakluh an tum ve nghal a, kum 23 mi English midfielder hmabak eng tak nei hi an lakluh ngei a rinawm hle. Aston Villa hian Southamton striker Danny Ings chu an lo lalut tawh bawk a ni.
Post a Comment