Rauthla 4th August, 2021 : MPCC chuan ramri humhalhna kawnga hlauh nei miah lo a theihtawp chhuaha Vairengte mipuite Ramri buaina kal zela India ram leh khawvel mit hmuha thiam chang zawk kan nih zia lantir tura Mizo thalaiten Social Media-ah a thim a var pawh thlu lova theihtawp chhuah laiin Sport Minister Robert Romawia Royte chuan Assam Chief Minister a tlawn, an ti.
MPCC chuan, Vairengte mipui leh Mizo thalaiten thiamchang kan nihzia an lantir nan tan an la a, hetih mek lai hian Sport Minister Robert Romawia Royte chuan tun ramri buaina a mawhphurtu ber a ngaih Assam Chief Minister Himanta Biswa Sarma chu Twitter kaltlanga tih lungawi tumin amah tlawnna thu ziak a post a. Ram leh hnam tana Mizoram mipuite inlungrual taka kan thawh ho laia Mizo mipuite inpumkhatna leh tanrualna tichhe thei zawng leh Mizo Thalaite rilru tihnual tur zawnga vai hlauh tlawnna thu, tunhnai buaina nena inkaihhnawih ni miah lo post a ni ta mai chu Congress Party chuan a hrethiam lo hle a, Assam CM tlawnna thu post tawh lo turin Sport Minister Robert Romawia Royte chu thuchhuah hmangin an hriattir.
Pathianin Mizo hnam ropui tak min din sak timualpho zawng leh, hnam dangten min hmusit theihna tura khawsa tawh lo turin Congress Party chuan a chah a, Robert Romawia Royte hian Assam CM Himanta Biswa Sarma hi a hlau viau a nih pawhin Mizo thalaite hriatah tarlang tawh lo se kan duh takzet a ni, an ti.
Mizoram chhung Vairengte-ah Assam Police-ten Mizoram Police Camp chhuhsaka silai hial an hmehpuah avangin Mizoram Police-ten huaisen takin an kap let a. Kan ram leh hnam tana Mizoram Police-te hnathawh hi Congress Party chuan a chhuang hle a ni.
Ramri humhalhna kawnga hlauh nei miah lo a theihtawp chhuah thin Vairengte mipuite hi Congress Party chuan a ngaihluin a chhuang tak zet bawk.
Post a Comment