Rauthla 07.August,2021 :Nimina Deputy Chief Minister Pu Tawnpuia hova sawrkar hotu lian leh political party hrang hrang aiawhte inrawnkhawm chuan Mizoram dinhmun enin total lockdown kalpui zel tul mah se, ei zanna hrang hrangin nasa taka a tawrh tawh avangin pawhsei zel chu thil tih chi loah an ngai a, chutih laiin inkhuahkhirhnate hlik vek erawh tih chi-ah an ngai bawk lo. Chuvang chuan fimkhurna uar zawka kalpui chunga sumdawnnate kalpui theih leh hna thawh theih sia inkaihhruaina khauh tak siam an rawt. Inrawnkhawmna kaihruaitu Dy CM Pu Tawnluia chuan tuna harsatna liantham pahnih, ramri buaina leh Covid-19 hrileng dona chungchangah mipuite, kohhran hruaitute, tlawmngai pawlte, political party hrang hrang ten sawrkar an thlawp zia leh sawrkar hnungah an din tlat a vangin lawm thu a sawi hmasa a. “Heng harsatnate te hian hnam angin harh tharna min pe mek a; kan tanrual phawt chuan engmah kan tan hneh theih loh a awm lo a ni”, a ti
Inrawnkhawmnaah chuan hrileng thawh khatna a\anga thawh hnihna kal meka sawrkar hma lak dan Mizoram dinhmun leh hmachhawp te sawrkar lam a\angin ngaithlak hmasak a ni a. Health Minister Dr R. Lalthangliana, Dr ZR Thiamsanga, Chairman, Covid-19 Medical Operational Team (MOT), Chief Secretary Pu Lalnunmawia Chuaungo, Chairman, State Executive Committee, Dr Pachuau Malsawma, SNO, IDSP, Dr T.Lalhmangaihi, Director, H&ME leh Dr John Zohmingthanga, Director, ZMC ten Covid-19 dona kawnga sawrkar hma lakna te leh tuna dinhmun te an sawi a.
Health Minister Dr R.Lalthangliana chuan “Nikum hrileng thawh khatnaah Mizoramah hrivei mi 5000 awm ta se tiin lo chhut lawkna neih a ni a, Mizoram Health Care facilities te siam belh leh a thawktute theih ang tawka tam lakbelh pawhin a enkawl seng dawn lo a ni tih te hriat lawk a ni tawh a. Chutiang harsatna a thlen lohna turin theih tawp tak meuh chhuah a ni a ti a. Hrileng thawh hnihnaah tunah hian damlo 13,094 enkawl a ni a, Doctor leh Nurse te indaihloh dan leh damdawi in pawn lamah hri veite enkawlna hmunhma ten a dawl theih thlawt tawh loh avangin fimkhur leh zual sauh a ngai a. Dinhmun duhawm lo takah kan din lohna turin “Total Lockdown chu chhunzawm a tul tih chiang viau mah se ei zawnna ten nasa taka a tawrh bawk si avangin inkaihhruaina( SOP) khauh zawk nena khawsakho te, hrileng laka himna tura kan tih tur - Covid-19 Appropriate Behaviour(CAB) te kan zawm uluk leh zual a ngai dawn a ni a ti.
Dr ZR Thiamsanga, chuan hrileng zirchianna atangin CAB zawm tha vengah hrileng inkaidarh huk a awm lo tih tun hnaia Tlangnuam leh Thakthing mass testing atangin a chiang a, Chutih lain CAB zawm tha lo colony leh building chhawnga chengho inlen pawh, inkawmho, chaw eikhawm leh intlawhpawh te chuan an inkaidarh ngei ngei tih a lang chiang hle a ni a ti. Zirchianna atanga thil pawimawh tak lang leh chu Vaccine lak a pawimawh hle a. Hrivei zingah Vaccine la tawhte chu an dam awlsam bik a, an hri vei pawh an tuar nep a, hri vei zinga nunna chan ta zingah vaccine la lo an tam hle tih a tarlang bawk a ni.
Health Department hotute leh ZMC hotute lam atangin Vaccine kalpui mek leh hmachhawp te, Covid-19 hriveite enkawlna tura bungraw chah mek kalkawnga thang mek leh thil tih tul te ngaihthlak a ni leh a. Hengah te hian sawrkarin hmalak chhunzawm dan tur te uluk takin sawiho a ni.
Sawrkar press releasein a sawi danin inrawnkhawmnaah chuan ZPM, INC, BJP, ZNP, PC leh MNF party hruaituten thu an sawi a. Political party hrang hrang aiawh te chuan hri leng dona kawnga sawrkar hma lakna chu fakawm an tih thu sawiin sawrkar hma lakna te an thlawp tlat tih an sawi a. Rawtna thenkhatte thehlutin total lockdown hlih chu a hun lo nia an hriat thu te, sumdawnna, ei leh bar zawn kawngah te total lockdown avanga harsatna nasa tak a awm mek avangin total lockdown anga inkhuahkhirh bur erawh a theih tawh lo nia an hriat thu an sawi. Chutih laiin total lockdown hlih nghal tawp chu a him loah ngaiin sawrkar chu CAB tha taka zawm a nih theih nan dan bawhchhiate hremna khauh zawk siam a, inkaihhruaina khirh zawk te buatsaih tur leh hrileng darhna hmunah te MicroContainment zone te siam chhunzawm ni se an ti a ni.
Inrawnkhawmnaah chuan Home Minister Pu Lalchamliana, School Education Minister Pu Lalchhandama Ralte leh DIPR Minister Pu Lalruatkima te pawhin thu an sawi a. Pu Vanlalngaihsaka, Secretary, Home, Pu R.Lalramnghaka, Secretary, Health & Family Welfare te an tel.
Post a Comment