Olympic chu 'khawvel' inelna a ni. A aia säng a awm tawh lo - khawvel pawnah an lo khel ve a nih ngawt loh chuan! Chu Olympic-a tel phak chu infiammi tán chuan hlawhtlinna piah lamah 'ropuina' a ni tawh. Lalremsiami Hmar chu Olympic-ah a tel phak a ni mai lo, palina a ni phak ngat.



Olympic-a tel phak harsatzia chu kan hrethiam tlâng ang. Keini buaipui ve ber football-ahte hi chuan India hian Olympic hi a la hlat lutuk, sawi chhuah ngam pawh a la ni mang lo - Siami chu Olympic semi final-ah a inlan zak zak tawh. Vannei phei se bronze medal rawn awrh haw thei tur, an vanduai ta hlauh a ni. 


Zêp thu a cheng lo, infiamna ngaina Mizote'n tunlaia kan khelh tam loh tak infiamna chu hockey hi a ni. Tun hma chuan a lar hle ṭhin a, tun hnaiah erawh en a hlawh lo a, a khel pawh an tlem. Tunah tak erawh kan game ngaihven rawn a ni ta thut.


Mi pakhat hian thil a thlak danglam thei ngawt mai. Siami vangin Mizoram leh Zoram pawna Zofaten Olympic hockey kan han en rual ṭhup a, inkhel kan han ngaihven tlâng ringawt maite hockey ngainatute pawhin an dream phak loh a ni hial ang.


Siami'n hockey khelh a lo thlang mauh maite hi a mak a, a naupanlaia Kolasib aṭanga Thenzawla hockey zir tura a chhungten an kaltir phal pawh hi a mak tho - chuta ṭanga Siami hmasawn chakzia leh a lawn san chakzia hlei hlei hi a mak a ni.


Kum 2000-ah khawvel huap chawimawina a dawng a, FIH Rising Star Award hlan a ni. He chawimawina hi football aṭangin teh ila, FIFA Young Player of the Year ang vêl a ni. Fédération Internationale de Hockey (FIH) hi khawvel huap hockey enkawltu an ni.


Tunah zet chuan tuma hmelhriat hlawh lo mai pawh ni lo, mi ngaihven miah loha hockey lo vahvaihpuitu Hockey Mizoram hruaitute pawh an hmai a uang tawh ang a, an fanu rangkachak Siami hlawhtlinna hi an hlawhtlinna a nih tel miau avangin fak an phu - kan fak e.


Hockey hi tun hma chuan Mizote game a ni. Mizote hi 'hockey thiam' tia sawi ṭhin kan ni. Hun a kal zel a, a nawlpuiin football lam kan hawi ta deuh ṭhup a, game dang khelh nuam tak tak kan hmelhriat chho zel nen, tiangkawm nena infiam ngat hi chu a khúa ang pawhin an tlem tawh - kutzungṭanga chhiar tham lek an ni hial tawh ang. 


A khel an tlem vang pawh hi a ni mahna, hockey khelmual hi kan nei tlem hle. Mizoram khawpui Aizawlah Hockey Mizoram hruaitute hian kum tam tak khelmual an lo zawng tawh. Anmahni sawi dan takin, "Football a khelh tel theih dâwn loh chuan kan phal lo," tih chu khawtlang hruaitute chhanna a ni deuh zel.


Tunah erawh hockey-a kan theihna kan hre chiang ta. Siami pawh heti khawpa a thlen san theih chuan, he Mizoramah hian 'Siami dang' hi an awm ngei tur a ni. An awm ang. Amah ngawtin Siami hi a piang danglam bîk lo ang - Siami dang an pian zel theihna turin mihring tamna khawpuiah hockey-in khelmual ṭha a mamawh e.


Siami hlawhtlinna hi amahah tawp lo se. A thilpek dawn leh a hamṭhatna dawn piah lamah 'Hockey' hian thilpek dawng tel thei se - khawpui chhungah khelmual ṭha an neih theih ngat chuan Siami ropuina hi a zual zel ang.


Chhungkaw tlawm tak aṭanga bul ṭan; retheih, lunglen leh hmuhsit thlenga tuar chhuak; Mizo infiammi zinga khawvel tehnaa thleng sang,Olympic-a palina ni thei Lalremsiami Hmar zahna chibai ka buk a che.

Post a Comment

Powered by Blogger.