Rauthla 05.08.2021 : Nimin chhun khan MPYCC President Dr. Lalmalsawma leh NSUI Mizoram President RB Lalmalsawma leh an an thawhpuite (MPYCC leh NSUI OB) chuan Mizoram Governor gate hmar lam kiangah Assam Chief Minister Himanta Biswa Sarma chet dan leh Assam-in NH 306 an dan pin avanga lungawi lohna an lantir a. President Ram Nath Kovind hnenah an lungawi lohna leh hma lak nghal ngai an tihte ziaka thlenna Mizoram Governor hnenah an thehlut.
Nimina an punkhawmnaah chuan Congress Thalai President Dr. Lalmalsawma Nghaka chuan thu sawiin, "Tun dinhmunah hmarchhaka rorel pawl inhlawmkhawm North East Democratic Alliance (NEDA) chuan eng nge awmzia a neihna kan zawt nawn a. NEDA hi kan lo sawi fo tawh angin India hmarchhak mipuite hmasawnna leh in unauna atana din a ni hlawl lo, tuna lang reng chu BJP leh a thurualpuiten politics-a chakna an nei theih nan chauha an din a ni," a ti. "Mizoram mipui nunna innghahna kawngpui National Highway 306 Assamin an dang ping tlata, heti chunga Ministry of Home Affairs-in hre reng chunga ngawih a chuh hi kan dem hle. Hemi chungchanga ngawih chuh tlat Prime Minister Narendra Modi leh Union Home Minister Amit Shah hi kan dem takzet bawk” a ti.
Congress Thalai President chuan, "MNF sawrkar hi Mizo mipui zahawmna humhim nan Assam Chief Minister Himanta Biswa Sarma thu berna NEDA an zawmna hi chhu chat turin kan ngen nawn a. Kan sawi fo tawh angin hmarchhaka ramri buai tamna chhan ber hi CAA vang a ni a, hei vang hian Mizoram MP-te pawhin sawrkar laipuia CAA an thlawpna hi titawp nghal turin kan ngen a ni," a ti
Post a Comment