Lawngtlai 10.August,2021 : Assam Chief Minister Himanta Biswa Sarma chuan Mizoram nena an ramri-ah chuan remna leh muanna (peace and tranquility) a awm leh tawh a ti a, state-te inkara ramri kum tam tak lo inhnial tawhna chu thil buai thlak (complex issue) a nih avangin zankhat thil thua chinfel mai theih a ni lo a ti. Ramri inchuhna chu Britisah hun lai atang tawhin a ni tih sawiin Sarma chuan Assam chuan state dangte nena inbiakna a nei mek a. State thar siam a nih laia ramri rinfel loah tun hmaa Congress sawrkar chu thiam loh a chantir.
Assam Chief Minister chu inrinni atang khan Delhi-ah a awm a, nimin khan Prime Minister Narendra Modi a hmu a ni. BJP hruaitu Himanta Biswa Sarma chuan Mizoram chuan kum 1870 vel laia British hovin ramhnuai (forest) innghah nana hmanga hriatttirna an chhuah inner line chu an demand a, Assam dinhmun chu constitutional boundary a awm a, Mizoram chuan hman lai ramri (historical boundary) a phut a. Assam chuan constitional bounndary a humhim a ni a ti.
Hetiang ni mah se, Sarma chuan tunah chuan state pahnih inkar chu chinfel a ni tawh a ti a. “Kum tam tak kal ta chhung khan kan ramri nena inkaihhnawih harsatna a awm a. Nikum September thlaah khan state pahnih inkarah inrinhlelhna leh ngaihdan inan lohna (difference) a punlun a, chuvang chuan tharum thawhna a thlen a, tunah chuan thil awm dan a muanawm tawh a ti.
Assam sawrkar leh Mizoram sawrkar chuan muanna leh inremna atan thu chhuah intawm an siam tawh a, tunah chuan thil awm dan a pangngai tawh a, lirtheite pawh a pangngaiin Mizoram lamah an kal leh mek a, tunah chuan thil awm dan a pangngai a, a muanawm a, engmah inepna a awm lo a ti.
Sarma chuan hmar chhak ramri buaina (dispute)ah Congress a mawh a, kum kha leh chen ro lo rel khan ramri an rinfel lo a ni a ti. Congress-in hmar chhaka state an siamin ramri a rin fel lo va, danah state siamna a belhchhah ringawt a ni a ti. Congress chuan hmar chhak inpumkhat a duh ngai lo a, chuvang chuan ramri-ah indo turin min hnut chhiah a. State siam a nih khan tha taka tih theih a ni a. Hun a lo kal a, inrinhlelhna a lo pung a, tunah hian chinfel tumin kan bei mek a ni a ti. Chief Minister chuan hmar chhak state-te chu an inang lo theuh a, mahse, inanna pawh an nei a. “Inhnialna chinfelna atan chuan kan inanna kan en a ngai a ni” a ti.
“Keini hmar chhak state te kan inbe mek a, hun rei atana chinfelna chu sawihona chauhin thlen theih a ni a. Dawhkana kan chingfel thei ang” a ti. Ramri inchuhna chungchangah sawrkar chuan Meghalaya leh Arunachal nen pawh sawihona a nei mek a ni a ti. “Meghalaya nen chuan hma kan sawn a, Arunachal nen chuan sawihona kan tan chauh a. Tunah state-te chuan ramri chungchang an sawi mek a ni a. State pakhat emaw pahnih emaw nen sawiho chuan kan sawifel thei mai mahna” a ti.
Post a Comment