Dt 23.7.2021(Zirtawp) tlai lam dar 4:30 vel atangin khawvela infiammite inkhawmpui lian ber Summer Olympics, Tokyo 2020 chu tan a ni ta a. Ram 205 atangin infiammi 11,090 zette chuan infiamma hrang hrang 56 ah medal an inchuh dawn a, ‘A theuneu lo, a mai mai lo’ tih ang vel kha a nih dawn avangin a nep thei lo hrim hrim a ni. Hetia infiammi an fuankhawm lai mek hian tlangval pakhat, boxing competition-a tel ve ringawt chanchin kan sawi dawn a ni.
Kum 20 dawn kal tawhah khan Mizoram khaw pakhatah Amateur Boxing Competition buatsaih a ni a. (Eizawn nana hmang loho pual). Tlangval pakhat, insualnaah pawh a chak zawka tang ngai lem lo, boxing clove nena minute khat pawh la ding ngai lo, tukthuan ei dawna chhungten an kaih thawh chawp thin, nilenga hman em em ringawt thin chuan “Ka tel ve dawn e,” a ti mauh mai a.
Sports dress leh boxing glove an lei chuk chuk a, ni hnih khat chu a han vai ve lawp lawp a! Zingah a thawh hma phah chuang hlei law! Ni ropui a lo thleng ta le! A tumpui tur pa nen chuan ring chhungah an vak lut a, *a meng rum nghal em em ringawt a!* Zei lo takin a ding sawi tluih a! An tan ta le! An inveh then then a, an kual zak zak a. Chutah a tumpui pa kut ding lam chu a rawn dawk chhuak zawk a, kan tlangvala bekah tak chuan a va innghat ta chawrh mai le! A thal tawp a, che tur a awm tawh lo! *Lu hai bur chunga zahna kâwn zawh zelin an in a thleng thei hram.*
Thufing chuan, “Bei hmain ngun taka ral rel a tha, rem i hriat poh leh i chak zawk ang,” (24:3) a ti a, “Inbei tûrin hmanhmawh takin kal suh, A tawpah i thenawmten an tihmualpho hun chein, A tihngaihna i hre lo mai dah ang e.” (25:8) a ti bawk. Heng Pathian thu atanga lang chiang tak chu mihring nun hi intlansiakna (competition) in a khat a, hnehtu zawk ni tur leh dam khaw chhuak (survive) tur chuan ngun taka ngaihtuah, inbuatsaihna tha tak neih, thawhrim a ngai tih hi a ni. Charles Darwin-a’n, “Survival of the fittest” a tih hi hnial viau dawn mah ila a dik thui em em a ni.
Intlansiakna khawvelah hian survive (ding khawchhuak) ve tur chuan ngun taka kan ngaihtuah a ngai a, rim taka kan thawh/zir a ngai a, uluk taka kan inbuatsaih a ngai a, theihtawp chhuaha kan beih a ngai a ni. Chutianga kan tih loh chuan mi hnungah Kawl êk kan thai mai ang tih a hlauhawm hle a ni. Miten min hmuhsit mai theih bik loh turin theihtawp kan chhuah ve ang a, a sang ber kan thleng ta chiah lo a nih pawhin kan tlin tawka sangah kan awm thei dawn a ni.
Chutiang ni tur chuan:;
_Zingah rei tak tak kan mu tluk tluk thin hi sim nghal a ngai._
_Kan tlin tawk leh theih tawk bakah tleeeem belh a ngai._
_Mi chetla vel thlirtu ringawt (Youtube thlir nileng ringawt lovin..tihte pawh telin) ni lovin intiksiakna huangah zuan luh ve ngei kan tum tur a ni._
_Tuipui zau tak, a vaukam lehlama hlimna, lawmna, sum leh pai awmna hmun thleng tura hleuh theuh kan ni tih hriaa hleuh ve tang tang a ngai a, a lai laklawha bansan a rem lo vang._
_Hrehawm pal tlang hmasak phawt hnuah nun khaw nawmna a awm tih hriain hrehawm kan paltlang a ngai tih hi kan vawn reng a ngai a ni._
Hetianga kan ti duh lo/peih lo a nih chuan kan tlangvala ang mai khian lu hai burin hringnun hi kan hmang palh ang tih hlauhawm tak a ni.
- P.C.Vanlalrova
Post a Comment