Hripui leng avangin hun rei tak kan inkharkhip ta a, chhungkaw tam zawkin an eizawnna hna an thawk thei tawh lo. Nitin eichawp dapa intung nung ve hram hram mi tam tak chu lungngai leh hrehawm takin an kun mek a ni. Retheih mangan laiin thenkhat phei chu he hripui chimawm tak hian an chhungkua a luhchilh mek a, an harsatna engkimah khawtlang hruaituten tanpui huamin duh mahse an mamawh phuhruk sen a ni lo. Mangang taka kan tanpuina rawn ngen kan tawng ta nual mai a. Hengte avang hian tanpuingaite tan tiin remchang kan rawn siam leh ta ngawt mai a ni e.
July ni 22, 2021 Ningani chawhma lamah vehbur khawnna post kan siam tan a, post siam tirh atanga he thu buatsaih lai thleng hian tanpuina pawisa cheng 78,100/- a lut tawh a ni. Post kan siam zan la la khan Aizawl chhuah lam veng pakhat a, Mapuii te chhungkaw tanpui nan cheng 20,000/- (singhnih) kan hlan nghal a ni.
Mapuii te hi eizawnna mumal nei lo, a rem rema inhlawha ei zawng thin an ni a, mi inhnuai luahin chhungkuain an khawsa a ni. An chhungkua an positive vek a, a pasal leh a fate 4 bakah a nu (a pasala nu) te chu 4-c ah enkawl mek an ni a, Mapuii hi ZMC lamah a awm avangin chaw ei man a chawi lova, a chhungte dang zawng mi 6-te erawh an ni khat chaw ei man pawh an tan tam tham tak a tling. Mapuii hi covid damdawi vawi khat khai man 2,000/- full course 12,000/- lak tir a ni a, bill a rawn kal hunah engtin nge a tih ang tiin a inngaihtuah hah thin hle a, zah pawh dawn lovin kan hnenah tanpuina a rawn dil ta ngawt mai a ni. MSR member te leh mi ngilneite zarah cheng singhnih lai mai kan han hlan nghal thei kha kan va han lawm tehreng em!
Kolasib district-a khaw pakhata cheng Pi Ramite chu an nupain an positive-a ZMC-ah enkawl mek an ni. An fate pahnih, naupang kum 10 mi leh kum 7 mite an kalsan tawp a, an fate hi an tunu kum 15 mi, inhranga awm chuan a lo awmpui a ni. An pa zawk hi kum 70 mi niin ICU-ah kar khat chuang a awm tawh a, ventilator nen enkawl thin a ni a, ventilator hi nimin lamah khan a hmang tawh rih lo. Damdawi in lam hian damdawi man etc. engmah an la bill lova, an awm zui zel dan tur an suangtuah thiam lova, an rilru a hah hle a ni. A rem rem thawka eizawng thin an ni a, an nu zawk hian chawhmehte a zuar kual ve thin. BPL card an nei ve thin a, gold card siam hun laiiin khawsak harsatna avangin an siam theih lova, hman theih a ni lo. Health care an nei lo bawk. Tanpuina tlingkhawm atangin Pi Rami te hi an account ah cheng singkhat kan thun.
Pi Rami te veng mi tho home isolation hun hmang mek, Pi Thari (30) cancer vei tanpui ngai a awm bawk a, a ni hi a nghawngah bawk a awm. Khawtlangin vehburte khawn sakin an buaipui reng lai a ni. A pasal nen fa 4 an nei a, an te ber kum 3 mi a ni. Pi Thari hi a chau tawh hle. An ni hi che chhuak thei an ni lova, an veng VCP account-ah cheng singkhat kan transfer-a a nin a cash in a lo pe dawn a ni.
Aizawl tlak lama veng pakhata cheng Rs-a chuan pile tha lo neiin a fa naupang zawk kum khat leh thlaruk mi chu a bawrhsawm hle a, doctor entir ngai a ni bawk a, entirna tur pawisa an neih loh avangin thla 4 vel chu an kuah ringawt mai niin Rs-a hian a sawi. Mi inhnuai luahin a nupui fanau te nen an khawsa a, chengkhatmah neih an nei tawh lo. A mangang lutukin zah pawh dawn thei lovin min rawn bia a, a hming leh veng hming tarlan vek pawh pawi ti lo khawpin a mangang takzet a ni. "I hming leh veng hming tarlang lovin kan ti dawn nia" tia kan han hrilh chuan lawm avangin a tap lo chauh a ni. A ni hian bank account a neih loh avangin an veng YMA president account ah cheng singkhat kan thun a, a nin a cash in a lo hlan dawn a ni.
Heng tanpuina kan pekte hi an khawtlang hruaitute be hmasain an chanchin an sawi te hi a dik ngei em tih kan finfiah hmasa vek a ni. Tanpuina hlantu zawng zawngte Lalpa'n a let tam takin malsawm che u rawh se..🙏
Post kan siam tan July ni 22 chawhma lam atanga chhiara ni 7 a ral thlengin tanpuina pek theih hun hi kan hawng ang. MSR in charity atana kan hman thin kan joint account-ah hian pek theih reng a ni a, ka phone number dah hi ka mimal account nen ka link avangin joint account-ah hian gpay a buaithlak deuh a. Hei vang hian ka mimal Gpay number hi ka dah tel a, tanpuina rawn lut chin hi chu hriat hran a harsa chuang lo e.
Account holder : Vanneihthanga & C Lalduhawma.
AC No : 32266773481
CIF No : 86301790407
IFS Code : SBIN0007058
SBI Mission veng branch.
ATM No : 5196 1902 4349 2651
Gpay : 9615949012
Post a Comment