Lawngtlai 28.07.2021: Assam Police ten July ni 26, 2021 (Thawhtanni) a Mizoram rawn luta buaina an siam vanga State pahnih inkara harsatna awmte su kiang turin Union Home Secretary Ajay Kumar Bhalla kaihhruaina hnuaiah vawiin chawhma khan Mizoram Chief Secretary Pu Lalnunmawia Chuaungo leh Assam Chief Secretary Jishnu Barua te chu North Block, New Delhi-ah an inbia a, Meeting ah hian tuna Mizoram Police awm mekna a CAPF te awm tir tura nawrna nasa tak a awm avangin inremna an neih theih loh avangin vawiin tlai dar 4:30 khan an indawr chhunzawm leh a ni.
Ministry
of Home Affairs leh Assam Chief Secretary ten nasa taka Vairengte auto
rickshaw stand atanga Mizoram police te tawlhsawn turin nawr chhunzawm
zel mahse, Mizoram Chief Secretary Pu Lalnunmawia Chuaungo chuan nasa
taka hnial leh dodalin, Mizoram sawrkar leh Mizoram mipuite duhdan a nih
loh thu leh an tawlhsawn nachhan tur an hriat loh thu sawiin a tang
tlat a ni.
Rei
tak inbiak a nih hnuah Mizoram leh Assam inrina NH 306 ah Central Armed
Police Forces (CAPF) duty chhunzawm turin remtih a ni a, CAPF senior
officer-in a hmunah a thutchilh ang. Hei bakah hian Mizoram leh Assam
sawrkar chuan CAPF duty ten tha taka hna an thawh theihnan sawrkar
laipuia Ministry of Home Affairs rawn chunga ruahmanna felfai tak siam
an remti a, ramri buaina chingfel turin zai ngai tawn tak chung leh
harsatna dang siam lova inbiak chhunzawm zel an remti bawk a ni.
Pu
Lalnunmawia Chuaungo, Chief Secretary chuan Assam in Mizoram kawngpui
an dan chah (Road Blockade) bakah rel kawng an tihchhiat avanga ei leh
bar lak luh kawnga harsatna kan tawh thu Union Home Secretary hnenah
hian thlen nghalin a rang lama chingfel tur in a ngen nghal bawk a ni.
Mizoram Chief Secretary hi Mizoram DGP SBK Singh chuan tawiawmin Assam Chief Secretary hi an DGP in a tawiawm ve bawk a ni.
Post a Comment