Parliament Monsoon session, vawiin atanga neih țan tur thlir lawkin nimin 18.7.2021 tlai dar 3.00pm khan Parliament House Annexe Building New Delhi, Main Committee Room ah Parliamentary Affairs Minister Pu Pralhad Joshi  kaihhruaiin NDA a tel party hruaitute leh an aiawh ten meeting an nei a. Prime Minister Pu Naredra Modi, Home Minister Pu Amit Shah, Defence Minister Pu Rajnath Singh te bakah BJP National President Pu JP Nadda te pawh meetingah hian an tel a ni.


He meeting ah hian Mizoram MP te pahnih, Pu C.Lalrosanga MP Lok Sabha leh Pu Vanlalvena MP Rajya Sabha te pawhin thu an sawi a. Pu C.Lalrosanga chuan tun Parliament Session chhung ngei hian India hmarchhak state te ramri buai chungchang sawichhuahna hun awm thei se a duh thu leh Mizoram leh hmarchhak State dang te ramri buai neih mek chu chinfel thuai tul a tih thu a sawi chhuak a. Myanmar raltlante chungchang pawh sawiin Pu C.Lalrosanga chuan Mizoram leh hmarchhak state danga raltlan Myanmar refugee te chungchang hi tun Parliament session chhunga au chhuah pui theih ngei nise a duh thu a sawi a. Meeting Chairman Pu Joshia chuan thusawi tur dilna pek luh hunah amah sawipui hmasa turin Pu C.Lalrosanga chu a chah nghal a ni.

Rajya Sabha MP Pu K.Vanlalvena pawhin thu sawiin Bairabi to Sairang Rel kawng siam mek atan kuminah cheng vaibelchhe sangkhat lai Mizoram chu pek a nih avangin lawmthu a sawi a. Kum sawmpakhat chhunga hna thawh tur ah 52% vel chauh zawh a la nih avangin hmabak hnathawh tur hi kum hnih lo awm tur chhunga zawh hman loh a hlauhthawn thu leh contractor leh officialte chu an hmalakna enpui tul a tih thu a sawi a. Mizoram khawthlang lama duty BSF te mamawh leh harsatna thenkhat te pawh he meetingah hian thlenin MNF leh India sorkar Inremnaa ziah lan, Mizoramin ama pual High Court a nei ang, tih chu kum 35 ral hnuah pawh tih hlawhtlin a la nih loh thu a sawi lang bawk a ni.


Nimin chawhma lamah khan NDA hnuaia party hruaitute meeting neih a ni bawk a ni.

Post a Comment

Powered by Blogger.