Lawngtlai 29.07.2021 : Mizoram sawrkarin Lawngtlai District-a accredited journalist-a a thlante Press Accreditation Card (PAC) hlanna hun leh District MJA member-te tana 'Journalist Workshop' chu vawiin khan Lawngtlai Press Club-ah District Information & Public Relations Office leh Mizoram Journalists' Association (MJA), Lawngtlai District tang kawpin an buatsaih.
Press Accreditation Card hi District Information & Public Relations Officer Pu C. Lalhruaitluanga chuan Lawngtlai District-a accredited journalist atana thlan mi pasarih hnenah a hlan a. COVID-19 hripui leng vangin kuminah Accreditation Card sem chhuah a khawtlai phah chu pawi a tih thu sawiin, sawrkarin accredited journalist nihna a pekte chu an hna thawhna leh an khawsazia-ah accredited journalist nihna vawng nung a, chawi sangtu nih tum turin a chah a ni.
He hun, District MJA Vice President Pu Elvis Lalthangzuala kaihhruaiah hian District MJA President Pu Lalngheta Ralte chuan sawrkarin accredited journalist-te chu tun aia awmze nei zawka a hman tangkai tul a tih thu sawiin, accredited journalist-te chuan an nihna zahawm tak chu vawn him a, tihzahawm chu an tih tur a ni, a ti.
Pu Lalngheta Ralte chuan, ramin hun harsa a tawh mek karah Journalist te chu Covid-19 Frontine Worker a dah tura Lawngtlai District MJA ten Chief Minister a an ngenna chu chhanna an la hriatloh thu leh sawrkar chuan a tihfel thuai an beisei thu a sawi a. Sorkar in Journalist te zingah mibik nina min pek hi a ti hlu tu kan nih a, a hlutna chu keimahni ah a awm ani tih hria a, chanchin thehdarh kawngah tan lak thar a ngaih thu a sawi lang bawk a ni.“ Lawngtlai District-ah hian MJA member sawm awmin, he'ng zinga pasarih chu state sawrkarin accredited journalist-a a pawmte an ni a. He PAC hi March 2023 thleng a nung dawn a ni.
Press Accreditation Card sem zawh hian 'journalist workshop' buatsaih zui nghal a ni a. DIPRO Pu C. Lalhruaitluanga chu resource person niin, journalist-te dinhmun leh hma sawnna tur leh tan lakna tur hrang hrangte ngaihtuah ho leh sawi ho niin, hlawk taka hun hman a ni.
Lawngtlai District ah hian MJA member sawm (10) an awm mek a. An zinga pasarih te chu Mizoram sorkar in Accredited Journalist-ah a thlang a. Chungte chu : V.Lallianzuala - Editor Lairam, ZD.Dengngura - Editor Phawngpui Express, Lalngeta Ralte - Editor The Lawngtlai Post, H.Lalrinmawia - Editor Rameng, Elvis Lalthangzuala - Editor Rauthla, Lalchharliana - Zonet Correspondent leh FC.Vanlalzawna - Editor Chhawkhlei Times te an ni.
Post a Comment