Mizoram chhunga Korean zaithiam ngaisangtute K-Pop fans te chuan nilaini zanah Assam Chief minister Himanta Biswa Sarma Twitter account an chawk buai hneh hle.
Thawhtanni ni 26.7.2021 tlaia Assam lamin Mizoram chhung luta Mizoram Police te duty post an rawn hnehchhuhna leh, Mizo te tiang leh teargas hmanga an beih hnuah silai an hmet puak hmasa a. Chumi buaina kal zelah Assam lam mi 6 thihna avanga social media lam Twitter lamah Assam Chief minister Himanta Biswa Sarma thu post chhan letna atang Mizo thalai rual chuan Twitter ah hashtag hmangin nilai zanah Assam an chawk buai nasa hle.
India ram mipui maktaduai 1,394 chuang zingah Twitter hmangtu hmangtu mi maktaduai 18.8 an awm a. India hi khawvela Twitter hmangtu tam lamah pathumna a ni nghe nghe. Hetiang a nih mek lai hian Twitter hi khawvel ram hrang hrangah a hmangtute hi sorkar lama mi pawimawh tak tak leh ramhruaitute an ni.
Chutiang a nih karah chuan zan khat thil thuah darkar khat vel chhungin Twitter a tweet tam ber, trending tam ber pangana chu #shameonassam tih a ni a. Hetianga hashtag hmanga trending tam ber a rawn ni thut mai chu Assam sorkar mai bakah Assam ram chhunga Twitter hmangtute mak tih a hlawh hle a, mak an tih thu an sawi chhuak hial. Zahna nasa tak a tling thei hial a ni.
Mizorama K-Pop ngainatu thalaite hian Twitter an hmang nasa hle a. An ngaihsan rawn K-Pop te hian an thu leh hlate social media dang hmang lova Twitter kal tlanga an puan chhuah avangin K-Pop ngaisangtute chuan Twitter account an nei deuh vek a ni.
Hetiang a nih avang hian Assam lama Twitter hmangtute chuan Mizorama K-Pop ngainatute hming in phuahdan hrethiam lovin, khawchhak hming an hman vang leh VPN address ah USA lamtea an lo thlak thin atangin China lam emaw, Japan, Korea, US lam emaw tiin Assam Chief Minister meuh pawhin, tu emaw a in rawlh ngei a rin thu a sawi nghe nghe. Kpop fans te hi India ram pawn lam mi te nen an inbe thin bawk a, hetiang a nih avang hian hashtag te hi foreign lam pawhin an hmu ngei a rin awm bawk a ni.
Nilaini zana K-Pop fans ten hashtag hmanga Assam sorkar leh an Chief minister an beih hun hi tlailam 4-5, dar 7-8 leh dar 10-11 vel a ni a. Hashtag #shameonassam #assamshotfirst #gobackassam #factcheck tihte chu an trending lar pawl a ni a. #shameonassam tih hashtag chu India rama trending nasa ber a nih tak hial avangin Assam lam ni ngeia rinten an report a, chhan mumal awm lovin bo phaha, a hnu rei lote ah #shame_on_assam tiin trending a rawn kal leh a, hei pawh hi hun rei lote chhungin India rama trending tam ber pawl a rawn ni leh hman tho a ni.
Hetianga Twitter hmanga Assam chungchang trending a nasat avang hian Mizoram chuan Twitter hmang turin Robot an hmang a ni thei, tih leh, ramdang puihna in Assam an beite a lar viau a ni. (www.rauthlanews.com)
-maro colneya bungsut
Post a Comment