Nimin khan (12.07.2021) Ministry of Tribal Affairs, Govt of India atanga Lai Autonomous District Council in Building Project pathum (3) zinga pahnih Tribal Girls Hostel leh Skill Development & Training Centre, Lawngtlai-a building sak mek chu Lai Autonomous District Council a Chief Executive Member Pu Manghmunga Chinzah chuan a hmunah kal in an building sak mek te tlawhin, hnathawktute chu ram mipuite tana chhawrtlak leh sorkar in a ruahman ang thlap a hnathawk turin a chah
Pu Manghmunga Chinzah chuan, project enkawltu VRS Construction & Consultancy, Aizawl-te chu Laifa-te tan thiltha tak hnuchhiah a, inhlawh rilru pu lova, ram leh hnam tana rawngbawl an nihna te hre reng a. Hna tha tak thawk a, a hun taka zawhfel anih theihna tura chak taka hnathawk chhunzawm zel turin a chah bawk a. He project a puitling theihna tur kawnga sorkar ang pawha hmalak ngai a awm anih chuan an inhawn reng thu a sawi bawk a ni.
 |
| Tribal Girls Hostel |
Tribal Girls Hostel hi Lawngtlai Vengpui-a Model English School bulah cheng nuai 350 seng a sak mek a ni a. Tunah hian Basement floor atanga First Floor thleng a column (ban), beam leh slab sak zawh tawh niin floor chung ber sak hmabak niin, chak tak leh tha tak hmalak tum a ni a. Kum 2022 March thla a luah fel hman tura beisei a ni.
Skill Development & Training Centre, Lawngtlai hi KMMTTP lama Trade & Customs Building sakna bulah cheng nuai 300 senga sak mek a ni a. Tunah hian structure zawh fel niin, finising leh completion hun chiah nghah a ni tawh bawk.
 |
| Skill Development & Training Centre |
Ministry of Tribal Affairs, Govt of India atanga LADC in Building project pathum zinga pahnih tlawhtu Lai Autonomous District Council a CEM Pu Manghmunga hi MNF District Hqrs President Pu Lalramliana Colney, Pu Lalzuienga Gen.Secretary, Pu J.Kapchungnunga Gen.Secretary, Pu RK.Zadeng Adviser leh Pu Elvis Lalthangzuala, President MNYF District Hqrs Lawngtlai te’n an tawiawm a. An ni bakah hian LADC a mi pawimawh tak tak te’n CEM hi an tawiawm a ni.
Tin, hemi bakah hian Vawmbuk ah Community Centre cheng Nuai 300 senga sak mek a ni a. Tunah hian super structure chin chu zawhfel tawh niin, roof truss leh plaster work hmabak a ni bawk.
Ministry of Tribal Affairs, Govt of India atangin LADC in Building Project pathum (3) sakna tur a hmu a, approved cost chu Ra 950.00 lakhs a ni a. He building pathum sakna tur atan hian 1st Installment atan Rs 450.lakhs hmuh tawh a ni. March 6,2019 khan LADC in a hmu a, chumi hmang chuan restricted tender tichhuakin, a bul atanga DPR buaipuitu leh he hna thawk thei ber tura ngaih VRS Construction & Consultancy, Aizawl te chu contractor atan ruat an nia. Tunah hian Project Manager Pu Robert Zothansanga'n hna hi a vil mek a. Kum 2022 March thla a peih fel hman tura beisei a ni.
Post a Comment