India ram doctor inzawmkhawm pawl Indian Medical Association (IMA) chuan hri pui thawh hnihnain ziaawm lam a pan chhoh mek lai hian nimin Thawhțanni khan thu chhuah siamin state Sorkar te chu Covid-19 laka invenna thlah dul mai lo turin a ngen a ni (PTI). 


IMA thu chhuah chuan hri pui thawh thumna hi "mathei loa lo thleng tur a ni,"  a ti. IMA in a sawi zel dan chuan "Khawvel puma hri pui lo leng tawh țhin chanchin ațangin finfiahna a awm a, chuvangin thawh Covid-19 thumna hi mathei loa  thleng tura ngaih tur a ni,"  IMA  statement chuan a tar lang.


IMA hian State Sorkar te chu  Covid-19 laka invenna ngai pawimawh tur leh vantlang puipuinna leh inhmuhkhawmna lian tham huaihawt rih lo turin a ngen a, hetiang hri pui kui țiaktu lian thamah an chang thei a ni a ti.  "Sakhuana nena inzawm puipuinna lian tham leh biak zinnaah te hian vaccine la lo te pawh zalen taka an pingpei tho avangin Covid third wave atan super spreaders ah an chang thei," tih IMA chuan a ti. 


 IMA chuan puipuinna thil leh sakhua thil vanga inhmuhkhawm leh biak zinna lam chi te reng reng hi  thla engemaw ti chhung atan sawn hlat theih leh tih khawtlai theih a ni. "Hetianga hun harsa leh pawimawh takah hian mitin te chu hri pui thawh thumna lo thleng mai thei up hlum leh hmetmit tura beisei an nih mek lai hian ram chhung hmun tam takah chutiang chu ngaihtuah lo leh Covid invenna pawh hre chang tawh lo khawpa intawllenna Sorkar leh pawl ho buatsaih a awm țan leh ta mek a. Khualpang zin, sakhaw thila biakzin te zawng zawng hi la tih rih loh leh tih khawtlai theih vek a ni, a ti. 


 IMA chuan state zawng zawng te hnenah ngenna thu chhuahin mipui punkhawm chu thunun rih turin a ngen a ni.  He thu chhuah hian Hindu sakhaw thila punkhawmna lian tham "Rath Yatra" Puri khua Odidha a ințan tur leh   "Kanwar Yatra" Uttar Pradesh leh  Uttarakhand state a awm mek leh lo awm leh tur denchhena chhuah a ni. 


Doctor inzawmkhawm te hian kum khat leh a chanve chhung zet hri pui an hma chhawnna ațanga an tawn hriat dan leh he virus nen an indonaah hian mi tam thei ang berin  vaccine la se, hemi bakah Covid thawh thumna tinep tur hian Covid laka invenna dan chu uluk taka zawm vek turin an duh thu an sawi bawk. "Tuna puipunna chi hrang hrang ațanga sum 

leh pai hmuh chhuah ai hian hemiin a nghawng chhuah avanga Covid dam lo  hospital enkawlna leh a nghawng chi hrang hrang vanga hloh (economic loss) hi a nasain ram sumin a tuar nasa thei zawk hle a, chuvangin hetiang puipuinna thil hi pumpelh leh tih rih loh a țul a ni. A rei lo berah tuna ațanga thla thum dang lo la awm tur chhung tal chu fimkhur leh uluk taka Covid kai lo tura awm dan țha (Covid-appropriate behaviour) zawm vek hi mitin tih tur a ni a, kan țhenawm hnai te pawh vaccine la vek turin kan ti tur a ni", tih IMA thu chhuah chuan a tar lang. 



Source :

Times of India 

July 12, 2021 

Huna Kawlvawm

Post a Comment

Powered by Blogger.