Lawngtlai District-ah hian football player talent tha tak tak an lo awm tawh thin a, mahse local football-ah an tawp mai thin. Laifa footballer te zingah local football-a tawp mai duh lo a awm, chu chu Bualpui NG tlangval Gratus Lalhnehliana a ni.
Aizawl FC senior team tana khel tur Gratus Lalhnehliana hi Jacob J. Chawngthu leh Lalmawii te fapa niin, Bualpui NG ah a piang a, a naupan laia atanga football tui a ni. A football career hi Bualpui NG ah tanin, Bualpui NG tan hian Lai Cup 2019 khan a khel a, hetah hian final an thleng a, Thingkah FC chu 1-2 in an hneh lo. Hei bakah hian Siaha College Veng FC tan a khel bawk. Siaha-a a khelh lai hian Beirona kaihhruaina hnuaiah a awm a, a ni tanpuina avang hian Aizawl FC Academy U-15 ah trial-in a tling a, kum 2019 thleng khan U-18 ah a khel a, hemi kum hian Dr. BC Roy Trophy U-18 ah Mizoram aiawhin in a inlan a, final-ah Punjab hnehin an champion.
Dr. BC Roy Trophy-a a chet that avang hian Railway FC in trial turin an ko a, a tling a. Helai vel hian India club tha Mohammedan SC chuan an club tana sign turin an sawm a, hei hi hnawlin Aizawl FC sawmna ngai pawimawhin Aizawl FC ah hian sign a tum ta zawk a ni. Gratus-a hian hri leng avangin contract hi a la sign chiah lova, tun atanga hun reiloteah hian kum 2 chhung atan contract hi a sign dawn a ni. Gratus Lalhnehliana hi vawiin khan Aizawl FC senoir team-a khel turin lakluh a ni.
Gratus Lalhnehliana hi Defensive Midfielder niin, jersey number 12 a ha thin a, tunlai rawlthar player hmabak eng tak nei tlemte zing a mi a ni. Gratus Lalhnehliana hian I-League an khelh hunah starting eleven chang ngei tura a beih tur thu a sawi a, training pawh nasa takin a nei mek a ni. Gratus-a hi tunah Bualpui NG ah a awm mek a, Aizawl FC hotute koh hun apianga phei thei turin a inbuatsaih a ni.
Kan khaw tlangval Gratus theih tawp chhuaha hmalam pan zel turin duhsakna ka hlan e
ReplyDelete