Office of Profit kalh MLA te ban tura hma lak bul tan a ni
Aizawl 3rd May, 2024: Vawiin hian PC Party chuan MLA te zinga Office of Profit kalha hna thawk te chunga Dan anga hma lak anih theih nana hmalakna bul kan tan.
India ramah hian MP (Rajya Sabha leh Lok Sabha-a Member of Parliament) te, MLC (Member of Legislative Council) leh MLA (Member of Legislative Assembly) te hi an hlawh leh hamthatna bak thil dang, Minister nih leh Parliament (Prevention of Disqualification) Act, 1959 in a phal sak bak, India sorkar emaw State sorkar emaw atanga neih a khap a. MP te hi Constitution Article 102 hmanga khap beh niin MLC leh MLA te hi Article 191 hmanga khap beh an ni a. Hemi avang hian MP, MLC leh MLA engemaw zat chu ban (disqualified) an lo ni tawh a ni.
PC Party in RTI hmang leh theih ang anga kan zirchianna atangin tuna Mizoram MLA zingah hian khíng dan khi bawhchhia an awm mek a. Hei hi dan bawhchhiatna anih mai bakah mipui duh loh zawng, hun kal zel tur atana kan ram leh hnam tana tha lo ni-ah PC Party chuan kan ngai a ni.
He thil tha lo hi tihtawp kan duh a. Political party tinin hetiang thil tha lo hi kan duh loh vek kan rin avangin hemi chungchanga hma lak pui atan hian vawiin hian Mizorama political party awm mek, heng - Mizoram Aam Aadmi Party, Mizoram Pradesh Bharatiya Janata Party, Mizoram Pradesh Congress Committee, Mizo National Front Gen. Hqrs., Zoram Nationalist Party leh Zoram Peoples Movement General Hqrs. te hi hmalakpui atana sawmna lehkha kan pe a ni.
Kan ram leh hnam tan hma kan lak ho theih kan beiseiin kan duh tak meuh a ni.
Alfred Zoremsanga Colney,
Secretary i/c Information & Publicity
PC Party General Headquarters
PC Party Press Release No. 20 of 2024
Dated 3rd May, 2024
Note:
Office of Profit and Constitution
Article 102: MP ten, Minister nihna bak, Parliament in Dan a siam hmanga an chelh theih bak office an luah thei lo.
Article 191: MLC leh MLA ten, Minister nihna bak, The Parliament (Prevention of Disqualification) Act, 1959-a First Schedule ami leh State sorkarin Dan hmanga a phal sak bak office an chelh thei lo.
The Parliament (Prevention of Disqualification) Act, 1959-a exceptions te:
Opposition Leader, Opposition Group Leader etc.
Post a Comment