Kan hriat theuh angin Covid-19 hi natna thar nikum lawka kan hmel hriat khawvel chawk buai vektu natna a ni a. A natna awmtirtu virus hming hi novel coronavirus, SARS COV-2 tia sawi a ni bawk. A natna thlen hming hi Covid-19 tih a ni a. Natna thar a nih avangin, a enkawlna chungchangah te, tihdan nghet leh tha ber tur a zirmite pawhin an la zir reng a ni.
Tun thlenga zirchianna tam tak lo awm tawh te atangin, he natna hrik inkai dan chu a veiten an thawkkhum atang te, an khuh leh hahchhiau changa natna hrik boruaka an tihdarh, lo hipluh attnga kai a ni deuh ber a. A natna hrik pai mekte an tawng, khuh leh hahchhiau hian natna hrik hi a lo chhuak a, chumi laia an kut a an hnar leh an hmai an khawih te hian a natna hrik kha an kutah a kai a, an thil khawih apiangah natna hrik kha an lo tidarh ta a, chu chu mi dangin an lo khawih veleh a, kut fai lova hmui hmai khawih te, mit nuai te leh hnar kawchhung zen te, inchibai leh inkuah atangtein natna an taksa ah a lo lut ta a ni.
Hei vang hi a nia,hmai tuamna hman dan dika hman, inhlata awm ( feet 6 danah tal) leh kut fai taka si lfo emaw/sanitizer hman a pawimawh em emna chhan chu.
He natna hrik taksaa a lo luh atanga natna a lan chhuah hun hi ni 5-6 vel a ni tlangpui a, ni 2 atanga ni 14 lai pawh a ni thei.
Natna inkai awl ber hunlai hi a hrik paite natna lanchhuah ni atanga chhiarleta ni 2 leh natna lanchhuah hnu ni 5 thleng niin mi thiamte chuan an sawi a. Hemi hun chhung hian kan thawkna dawtah virus hi nasa takin a pung a, virus inthlahpun dan chu sawi tam lo rih ila.
Hetianga virus a lo pun mek lai hian kan taksa raldo pawl pawh a awm mai mai bik lova, natna hrik lo thianfai tur hian theihtawpin tan a la ve a, tichuan a tan lak dan a dik chuan natna hrik te kha a lo thianfaiin, a pung zel tur pawh a lo dang thei a.
Kan taksaa natna do pawl te kha an tan lak dan a dik tawk loh va, an lo phusa vel vak ringawt a nih emaw an lo inhawrkhawm vel vak vak a nih chuan kan taksa tan, kan chuap atan a him lova, virus an beihna lamah kan chuap an hliam thei a, hei erawh mi tam tak chungah a thleng lem lo.
Tichuan natna hrik pai tam zawkte chuan symptom an neih atanga ni 10- ah chuan virus kha intipung thei tawh lo turin an thuhnuaiah an dah tawh a. Hemi avang hian a nia “Exit test hi tih kher a tul tawh lo ve”an tih chhan.
Amaherawh chu natna benvawn lo nei sa TB, HIV positive, Cancer, adt avanga hatsatna neite chu ni 10 hnuah pawh an taksaah virus hi a la pung thei a. A bikin taksa raldo pawl nei tlem tawhsa mihringah hei hi a awm thei, chung mite chu ni 10-ah discharge ngei ngei tur tihna a ni lova. An natdan azirin chhuah tir dawnah Exit test kha tih tur a ni.
Covid-19 natna neite hi thil chi 2 hmangin a enkawlna/dahhranna hmun atangin chhuah (discharge) thin an ni tlangpuia, pakhatnaah chuan symptom based discharge a ni a, a dang leh chu test based a ni.
Natna an la neih reng lai chuan chhuah tur an ni lova, chutih rualin test based-a kan tih chuan test-a negative, mahse natna Covid-19 nghawng te pawh an lo la nei thei a ni.
Hetiang hi thil awmzia a nih si avangin Ministry of Health and Family Welfare, Sawrkar laipui a mawh latu chuan mi thiam hrang hrangte rawnin, Covid -19 natna neite enkawlna hmun/dahhranna hmun atanga chhuah dan tur kaihhruaina a siam a, chumi chu innghahnaa hmangin Mizoram sawrkar pawhin damlote chhuah dan tur kaihhruaina hi a ti chhuak a ni.
Khawvel ram hrang hrang leh India ram chhungah pawh state tam takin an lo hmang tawh a, Mizoramah erawh mipuite ngaihthat dan ber kha ngai pawimawhin hman a ni lawk lo zawk a.
Exit test hi natna tuartu a zirin tih a ngaih hun a awm a, doctor a enkawltuten tih ngai an tihte tan chuan tih zel tur tho a ni a. Mahse RAgT emaw RT-PCR-a test-a positive insawiselna engmah nei lote, leh insawiselna tlem te chauh neite, 3C/ 4C/ Home isolationa ni 10 lai dahhran tawhte tan chuan exit test nei lova in chhuahtir hi a him a, chhuah hnuah erawh Covid kai lo tura fimkhurna (Covid appropriate Behaviour) kha chhunzawm tur a ni.
Post a Comment