Lawngtlai 11.06.2021 : Vawiin hi Green Mizoram Day a ni a. Mizoram-a District hrang hrang ah ‘Tuihna leh boruak tha siam nan thing I phun ang u’ tih thupui hmangin he hun hi hman a ni a. Hri leng avangin kum dang angin hun hman theih ni lo mahse, sorkar SOP te zawm chungin thing phun hnatlang hi neih a ni. Hri leng avangin nunphung a ziaawm tak tak thei lova. Kan fimkhur loh avangin hri hi kan kai thei a, a ti darhtu kan ni thei bawk a ni. Vawiin lama thil thleng thenkhatte lo tarlang leh ila.
1. Vawiin khan District hrang hranga Covid-19 vei enkawlna hmun atangin mi 200 an chhuak. Aizawl -103, Lunglei - 36, Lawngtlai- 28, Kolasib- 18, Khawzawl-5, Mamit-5, Serchhip-4 leh Champhai-1
2. Mizoram FDA chuan hma an lak zel naah Covid-19 hripui leng laka invenna atan Hand Sanitizer chikhat, a hming ‘Reene’ tih chu a him tawklo tih hmuhchhuah belh a ni. WHO in Coronavirus laka kut tihfainana Sanitizer him chin a tih chu 80% Ethyl Alcohol emaw 75% Isopropyl Alcohol emaw pai a ni.
3. Vawiin khan Lai Autonomous District Council-a, Executive Member i/c DM & R changtu Pu. Rongura chuan MNREGA sum hmanga VC ten Pu. Nohmunga inthlang kawng hmasawn zelna tur atan a an nawr chu tunlai ruahsur avang a tawlh chu a hmun ah lo kalin a enfiah a. Lei tla zel tur chhanna atan Silpauline panga (5) khawtlang hruaitute hi a pe a ni.
4. Vawiin khan LADC-a Executive Member i/c Education (P/s) Pu Sanghuliana Mualchin chuan Primary School Teacher Association hruaitute nen inkhawmhona neiin, zirtirtu school hrang hranga semrual anih theih nana an hmalakna enawnin thil tu leh pawimawh hrang hrangte an sawiho.
5. Vawiin khan Lawngtlai District ah Green Mizoram 2021 hun hman niin, Lawngtlai atanga Mampui panna kawng dung ah thing tiak phun hnatlang hi neih a ni a. Kumin Green Mizoram Day ah hian sorkar a Department 25-te hnenah thing tiak phun tur 283 pek chhuah an ni.
6. Vawiin June 11 khan Lai Student's Association-a hruaitu lo ni tawh, tlang hrang hrang awm ten Whatsapp Group an siam kaltlanga an pawisa thawh tlingkhawm ?. 10,000 chu Thingkah IR Bn. Qtrs. CCC a awm te tan an pe.
7. Vawiin khan Lai Autonomous District Council-a Chief Executive Member Pu Manghmunga Chinzah chuan, tunlai hri leng mekah hian fimkhur thil ah test a hmachhawn a, vanneih thlak takin a negative a ni. CEM chuan mipui te he hri leng laka kan fimkhur zuala sorkar SoP siam te zawma tawmim hram hram turin leh inhlat leh hmaituam (face mask), kut bawlhlo (hand sanitizer) hman uar turin mipuite a chah bawk a ni.
8. LADC a AH&Vety Department changtu EM Pu Sanghuliana Mualchin hmalakna in, ran vulhtute nantna, an kawchhung enna khawl Ultrasound an nei thar a. He khawl thar hi ran vulhtute tan a tangkai hle dawn a ni.
9. Young Lai Association Mualbu 'L' Branch chuan Chawngte 'L' forest range atang thingtiak lain, vawiin khan an khawchhung hmun remlai leh an tui tlan hnar lamah thingphun hnatlang an thawk a, thingtiak chi hrang hrang, Ngiau, April, Thlado leh thing tiak dang te phun in, thing chi thahnem tak an theh bawk.
10.Vawiin khan Health Minister hoa Mizoram Kohhran Hruaitu Committee, Medical Operational Team, Jt.NGO Co-ordination Committee leh Local Level Task Force thukhawm chuan Total Lockdown kalpui mek chu NI 14.6.2021 zing dar 4:00-a a tawp hunah inthlahdul nghal tawp tha an ti loa, a kalphung tur erawh State Executive Committee on State Diasater Management Authority kutah an dah.
11. Vawiin khan Karlui-I ah Medical Team ten Active Search Case (ACS) an neih chhunzawm a. Sample 372 endik atangin Covid-19 positive 81 an hmuhchhuah belh a, ti hian Karlui-I ah hian ACS an neih atangin Covid-19 positive 146 an hmuchhhuak a ni.
12. Vanduaithlak takin Pu C.Vanlawma (75), Chaltlang Lily Veng chu zanin June ni 11 dar 8:15 khan COVID-19 vangin ZMC-ah a boral. June ni 1 khan hri a kai tih hriatchhuah niin hemi ni vek hian ZMC ah admit nghal a ni a. Amah hi natna benvawn dang vei sa a ni.
13. Vawiin khan Lawngtlai-a Covid-19 sample endik atangin Covid-19 positive pathum (3) hmuhchhuah thar an awm a. New Vengpui ah -2 leh Lawngtlai Chandmary ah -1 te an ni. An vaiin mipa vek an ni.
14. Vawiin khan Chawngte CHC ah sample 52 endik zingah Covid-19 positive 15 hmuhchhuah thar an awm, ti hian vawiin Ni 11.06.2021 hian Lawngtlai District ah Covid-19 Positive 99 hmuhchhuah thar an ni ta a ni.
15. Mizoram puma ni 20.04.2021 atanga COVID-19 laka inven nana inkhuahkhirhna khauh zawka kalpui chu Lawngtlai khawpui chhungah pawh khauh taka kal chhohpui zel a ni a. Lawngtlai khawpui chhung veng 12-a COVID-19 Executive Duty-te chuan vawiin khan dan bawhchhia mi 14 manin, he'ng an mi mante hi pawisa ₹ 1,400/- chawitir an ni a. COVID-19 vanga inkhuahkhirhna kalpui chhung hian dan bawhchhia mi 1,115 man tawh niin, pawisa chawitir zat hi ₹ 1,30,750/- a tling tawh a ni.
Post a Comment