KHAWL NEIH THAT LAMAH TLUK LO MAH ILA, SORKAR LEH MIPUI TANRUALNA AVANGIN MEGHALAYA STATE AIIN KAN LA ZIA -Vanneihthanga

 KHAWL NEIH THAT LAMAH TLUK LO MAH ILA, SORKAR LEH MIPUI TANRUALNA AVANGIN MEGHALAYA STATE AIIN KAN LA ZIA -Vanneihthanga

Thahnem ngaihna avangin Delhi khawpui dinhmunte ziakin, thenawm state Meghalaya infrastructure neih dante kan han tarlang tawh kha a ni a. 

Mizoramin hripui kan do dan hi state dangte tan pawha entawn tlak a awm ve tih hi kan hriat tel a tulin ka hria. Hemi ti chiang tur chuan, uluk taka chhutna (statistics) a pawimawh ang. 

 Shillong khawpuiah RTPCR laboratory 3 awmin, CBNAAT pahnih bakah TrueNAT pathum an nei a. District hrang hrangah sorkar damdawi in leh CHC thlengin TrueNat laboratory neiin, RAT hmanga sample endikna hmun tam takah an nei bawk a, private hospital ten hri veite an admit thei vek tihte kan tarlang tawh a ni.

Hetiang taka infrastructure lama an inbuatsaih chung hian, covid-19 dona kawnga an hmalak danah Mizoram aiin an hlawhthlinna a hniam zawk tlat mai. 

Mizote hi kan vannei em em a, ram dangin an neih ve loh, khawtlang thatna atana pawl tangkai; NGO leh Kohhran kan nei a, VLTF/LLTF te bakah mipuite tanrualna avangte pawh a ni ang. Hmasawnna ruhrel beitham tak nei mah ila, kan neih ang ang hmang tangkaiin kan thawhrim rah tam tak hmuh tur a awm a ni.

Meghalaya hian keini aiin Infrastructure chu an nei tha zawk ngei mai a, keini'n RTPCR lab pakhat kan nei a, sample kan test tawh zawng zawng hi 1.51 lakhs vel a ni a. Meghalaya test figure hi 1.85 vel a ni. Population atanga chhutin Mizoramah hian test % a tam zawk hle tih kan hrethiam awm e. Mizoram district hrang hrangah TrueNAT laboratory 10 kan neih atanga sample test tawh zawng zawng hi 29,991 a tling hial a ni. 

Kan Infrastructure hi a theih ang anga tih chaka thuam that a ngai a, chumi beiseina avang chuan India ram khawpui Delhi dinhmunte bakah, thenawm state Meghalaya-te hmalak dante kan han tarlang a ni ber a. Mizoram state sorkar tan lakna tur a tamin hmabak kan la ngah khawp mai tih a chiang hle a ni.

Meghalaya state-ah hian tun dinhmunah covid positive atanga chhutin 1.73% an thi a, Mizoramah hri vei thi hi 0.024% a ni thung. Heng atang hian kan phaktawk anga theihtawpa hma kan lak tlanna hian awmzia a nei tih a chiang viau a. Chutih rual erawh chuan infrastructure lama mipui rualawhna hi kan sorkar hian nasa zawka a bawhzui a ngai takzet a ni. 

Mizorama covid-19 dona operation kan kalpui danah hian, hri vei hriatchhuah ran tuma tan kan lakna hian, hri avanga thihna/mortality rate a ti hniam hle ni pawhin a lang a, contact tracing chak taka kalpui chuanga random test kan kalpuite pawh hemi atan hian a pawimawh hle ang.

Covid-19 symptom nei nia inringhlel thenkhat, test tih zung zung a awlsam loh vanga ngawi zui ta mai mai kan awm thin ni te pawhin a lang a, awlsam taka symptom nei nia inringhlelte an in-test zung zung theih nan ruahmanna Health Department lamin an siam chho ve zel turah te pawh ngai ila a tha ange. Damlo, an serious viau hnu chauhva test, medical treatment pek tlai avanga thi hi kan awm nual tawh niin a lang.