Hmunpui lam pana an inphurh chhoh laia peih lohsantu a nupui ruang kil ve turin putar chu an rawn hruai a. Ambulance atangin chau takin a lo chhuk taih taih a. Tuman an pui lo. Tunlaia tawngkam lar ni ta, Full PPE-a inthuamin, a chhip atanga a ke ler thleng chuan a inkhuh zut mai a. A hmai a tuam bawk. Khaw lum hnuaiah pai khat khat chungin a nupui kuang chu a pan phei hnak hnak a. A chau hle tih a hriat a.
A lusun mek bakah a hripui kai ve boruak ringawt pawh chu saruaka tawrh atan pawha thaw ti-ipik tham a nih laiin, a inthuamna ringawt pawh chu chauhpui zual tham a ni si. A nupui zalhna kuang bul a thlen chuan a’n thu dawn a, a thu nghet thei lo chu a tlu sawp ta niai mai a, chhuatah chuan mittui nen a tal zui ta hal hal mai a. A hmai tuamna pawh a phelh ta hial a.
Putar chak lo a ni asin maw le! Mahse, tuman an pui si lo. Puih an duh lo a ni lo, a rem ngang lo a ni ber e! Hripui kai a nih miau avangin mipui zingah pawh awm ve loa dah hran tur a ni zawk miau si. Mipui zinga a nupui ruang rawn kiltir chu thuneitute khawngaihna a dawn vang zawk a ni mah si!
Khami khuaa thuneitute leh mipuite kha an rilru a zauin lainatna an lantir nasa zawk khawp asin! Min thenkhat chuan an hmangaihte thlahna hun tha an nei zawk hleinem!
Kha khuaa mi, a bula awmte rilru tur kha ka ngaituahpui a, hrehawm an tih ka ring. Kha putar khawngaihthlak, hripui vei leh lusun mek kha puih an châk dawn lutuk a, puih duhin an thutna atang khan an tho uk uk hian ka ring a ni. Mahse, puih mai dan tur an hre lo a ni ngei ang. Hri chungchang hriat loh an ngah si a, kai ve an hlau dawn bawk si.
‘Kan buante hi tisa leh thisen a ni si lo,’ tih ang deuh khan kan beih mek hi hriatthiam kim a har riau a. Setana ang maiin a zia a thlak sek mai a. Hriat belh tur thil thar a awm belh ni tin mai si. Tumah hi indem hleihtheih pawh a ni lo e.
Covid19 avanga thite atangin hri a chhuak thei lo tih kan hriat chian hma chuan an kuang chunga pangpar dah tur ringawt pawhin chhip atanga ke ker thlengin kan intuam phui tlat a nih kha. Vuitu leh kuang zawntute pawhin chutiang tho chuan! Tunah erawh kan hriat chian belh tak zel avangin hmuh nuam takin kan inthlahliam thiam ta a, chhungte tan pawha rilru damna thlap turin mi dang kan vui dan nen a danglam ta lo. Thil nihna dik kan hriat hi chuan Mizo Kristian, mi dangte rilru tur ngaihtuah thiam kan nihna hi a lang thuai zel a nih hi!
Covid vang hian invui zel ngai lo se kan va ti em! Manganna tur leh buaithak a tam bik si. Chhung khat lainaten an ruang an kil dan tur thlengin rorel fe a ngai zel ta mai bik a nih si hi. Ngaihtuahna sen ngai dinhmun kan lo thleng palh leh ta a nih pawhin pawngpaw hlauh aiin kan hmelma mizia hi ngaihtuah tel a tha.
Hripui kai mek, la dam laite taksa hmun tin atangin hri a rawn chhuak dawn lo. An chhungte ruang rawn hmua, thlahna thu hnuhnung rawn tahpui ve duh site hi invenna famkim (full PPE)-a an inthuam a ngai lo a, mi dang tana an hlauhawm loh nan an hmai tuam tha hle se la. Mi dang zawng zawng pawh hlam khata inhlata hmai tuama kan awm vek tur a ni ang tho hian mi dang nen inhlat ve se la. Fimkhur zual nan mi dang tlem lai deuh pawh chuh thiam se a tha. Invenna thuam famkim (full PPE) hi hripui veite hak tur ni loin, hripui veite bula awm hnaivai zualten an lak atanga an inven nana an hak tur a ni zawk.
Kan putar khawngaihthlak khan a hmai tuam se, full PPE-a inthuamin tuin emaw a kaih theih tih hria se chu, amah puih châk em em sa, kha khaw nula tlangval tlawmngai rual kha kha an tho suau ang maw le!
Kha putar kha khawngaihthlak hle mahse, mipui rilru kaiharhtu a ni ta hlauh a. Mi tamtakin rilru lama hahdam zawka an chhungte an thlah theihna atana malsawmna biru a lo ni zawk. A hnua mitthi, an chhungte ruang kil turte chu an veng thuneituten tihdan an thiam ta riau hlawm. Mi awm loh lai deuha hmai tuama ruang thlahtir an awm a, Dawrpui Vengtharah chuan vui laiin hri kai mekten ruang an kil ta hial mai! Hmai an tuam a, hmaikawr (face-shield) an hmang a, mi dang nen an inhnaih lem lo! Veng tinah zan khawthim laia invui chuk chuk a awm ta lo zel bawk a. Thlanmuala inphurh tlang vawk vawk a awm ta lo. Mipui tin darhsan vek hnua thlanmuala Full PPE nena kuang tah lai hmuh tur a vâng ta hle e.
Mizo Kristian nih zawng, lusun karah pawh thinlung hi a dam huai huai thei zel a nih hi.
Inthlahliam leh ro harsa rel fo a ngaih loh nan fimkhur reng a tul a nih hi. A chi thar, Delta variant, inkaichhawn awlsam bik chiin min chenchilh nia doctor-ten an rinhlelh sa, mipui pawh fimkhur zual tura min zirtirna reng kha a dik ngei tih finfiahna kan nei thar ta bawk si.
Post a Comment