Zanin Dar 9:30 hian Croatia leh Spain ten Euro 2020 Round of 16 an khel dawn a, Croatia hian an player pawimawh tak pakhat Ivan Perisic chu Covid1-9 hri a kai avangin an chhawr thei dawn lo.
Ivan Perisic hi inrinni khan hri a kai tih hmuhchhuah a ni a, ni 10 tal inkhunghran a ngaih dawn avangin Croatia hi lo vannei in Final an lut a nih ngawt loh chuan a tan Euro 2020 zin kawng a tawp mai dawn a ni.
Kum 2018 World Cup khan Croatia hian Final an luh anih kha, hemi tum pawh hian Inter Milan winger Perisic hi final an thlen theihna tur atan a pawimawh hle a. Tun Euro 2020 khelh mekah pawh hian an rinrawl ber a ni a. Goal hnih a khung tawh nghe nghe a, final an lut anih chuan Croatia hian Peresic hi an chhawr leh theih dawn chauh a ni.
Vanneihthlak takin Croatia squad-a player dang leh staff zingah hri kai dang an awm lova, Spain an hmachhawn turah erawh rilru khingbai takin an khel dawn a ni.
Tun tournament ah hian Ivan Perisic hian Czech Republic leh Scotland an khelh tumin goal khat ve ve a khung a ni. International tournament ah goal kua (9) a khung tawh a, Davor Suker nen Croatia tana goal khung tam ber an ni.
Post a Comment