Pune-a inkhuar Serum Insitute of India (SII) chuan thla thar atang khian naupang vaccine enchhina an kalpui dawn.
An coronavirus indanna vaccine siam Covovax chu naupang 920 hnenah phase 2 leh 3-na atan enchhina an kalpui dawn a. Kum 2 leh 11 inkar leh 12 leh 17 inkar naupang 460 ve ve in he vaccine hi an dawng ang.
He Vaccine NVX-CoV2373 hi America rama biotechnology firm Covovax siamchhuah a ni a, India ramah Covovax tih hmangin siam chhuah a ni ang. Hei hi India rama Covid-19 vaccine naupang tana enchhin vawi 4-na tur a ni. SII leh Covovax thawkdun hian kumin September thla chhungin puitling tana hman theih turin tlangzarh an tum a, naupang tan kumin kum tawp lam an tinzawn bawk.
Naupang enchhin turte hi hmun 10-Bharati Hospital leh Pune-a KEM Hospital Vadu Branch-ah enkawl an ni dawn a. Ni 21 inkar dana dose khatna leh dose hnihna pek an nih hnu thla 6 chhung an awm dan heng damdawi inte hian an thlithlai zui ang.
An ruahmanna ah chuan Kum 12 leh 17 inkar hnenah vaccine pek hmasak an ni ang a, an zawhfel hnuah Kum 2 leh 11 inkar hnenah an pe chhunzawm leh ang.
SII hian damdawi hralhchhuahna licence an neih theihna turin vaccine an pek chhin atanga thla 3 hnuah a hnathawh dan chiang taka chhinchhiahin thuneitute hnenah an thehlut ang. Drug Controller General of India (DCGI) thuchhuah thar bera a lan danin company ten’n vaccine hralh phalna licence chu enchhinna an zawhfel hmain vaccine chu ramdanga enchhin alo ni tawh dan a zirin an dil tan thei ang tih a ni.
Covid-19 vaccine hi ram hrang hrangah damdawi siam chhuaktute’n an enchhin mek a. Kumin September - october thla chhungin India ram pawhin a neih ve hman a rinawm US chuan Pfizer Covid Vaccine chu naupang kum 12 chin hnenah pek phalna an lo tichhuah tawh a ni.
Post a Comment