Lawngtlai, 2nd May, 2021: Vawiin khan Pu Lalbiakthanga Khiangte, (IPS) DIGP (Nothern Range) hovin Mizoram Police hotuten Aizawl SP Conference Hall-ah Mizorama Covid-19 hri darh chak zel venna kawnga police duty dan ennawnna (Review Meeting) leh khauh zawka kal dan tur an ngaihtuah.
Vawiina Security Review meeting-ah hian Pu Lalbiakthanga Khiangte, DIG(Northern Range) chuan Covid-19 darh zel tur venna a sorkarin inkaihhruaina a chhuah (lockdown guideline) chu uluk taka zir chiang a, khauh zawka kengkawh turin Police officer kalkhawmte a chah a. Tuna Aizawl khawpuia police duty mekte tha tichak turin Aizawla Police Unit hrang hrang awmte atangin Police force lak khawm an nih tur thu sawiin; Covid-19 hri leng darh chak lutuk titlem tura sorkarin dan a siam Lockdown Guidelines leh The Mizoram (Prevention and Containment of the spread of Covid-19) Act, 2020 chu khauh lehzuala kenkawh a nih tur thu a sawi.
Vawiin meeting-ah hian Police duty te a hmuna enpui turin Zonal Officer atan Gazetted Police Officer 4 ruat thar an ni a. Aizawl khawpui chhunga Covid-19 hri darh zel tur venna atana Police duty te chu an mawhphurhna pawimawh zia hre thar fo tura chahin, fimkhur taka an mawhphurhna hlen chhuaka duty tura fuihin, hawihhawm tak leh dik taka dan kengkawh turin a chah bawk a ni.
DIG (NR) hi Sr.SP Aizawl District, Sr.SP Traffic leh Aizawl khawpui chhunga MAP/IR Bn a Commandant 3 (Pathum) ten an tawiawm a. Aizawl khawpui chhunga Covid-19 dona a duty-te enpuitu Addl SP 2, SDPO 2 leh Aizawl khawpui chhung Police Station OC te an tel bawk a ni.
-DIPR
Post a Comment