Vawiin ah hian thilmak a thleng ni ber in ka hria a. Keima lo inrin dan ah hi chuan Vote 2000 chuang hi kan hmuh ka ring a. Mahse, tuna kan chakna hi 2950 a ni a, bye election ah chuan oppostion kan chak ngai lova, rulling chak tura rin a ni. Oppostion kan chak hi thilmak a ni a. Tin, kan chakna margin heti tak mai a, a sang hi thilmak a ni a. Min disqualify atang khan Pathian hian thiltum a nei a, ruat lawk a nei niin ka hria a. Pathian kaihhruaina hi hai rual loh in kan chang bawk a. Pathian hnenah hian lawmthu ka sawi ani, a ti.
Mimal takin Pathian hian chawisan mi duh a, tin kan party hi min chawisan a duh bawk a. Chumi atang chuan Pathianin a ruat lawk thil lo thleng ni mai in ka hria a ni, a ti bawk.
Pu Lalduhoma chuan, Anti defection hi a letlingin hman a ni a. 'Mahni thlangtlingtute phatsan tu emaw bansantu te tih a ni. ZPM kha chhuahsanin party dangah lut ta ila, ZMP ho kha an thin a ur ang a, Speaker hnenah min hek ang a. Speaker in min ban tur a ni zawk a ni. Amaherawhchu, kan party ni lo MNF party ten min hek kha a ni a. Kha min hekna ah khan, ‘A thlang tlingtute a phasat a, a chhuahsan ani’ tih a awm reng reng lova. A ZPM lutuk tih a ni, amah thlang tlingtu te lakah a rinawm lutuk min tihna daih a ni. Chuvang chuan min hekna kha a dik lova, Court ah pawh kal ila, thiam kan chang dawn sa tih a chiang reng a ni. India rama la awm ngai lo anih avangin, amaherawhchu hun kha a duh rei dawn si a. Tun term chhungin final hman anih kan ring lova. Law court a kal ai chuan mipui court a luh mai kha kan hotute’n an thlang ta a. Tunah hian Serchhip mipuiin kha thil ah khan, mipui court ah thiam min chantir ta a ni.
Law Court a kal lo tih chungchang ah khan MNF MLA ten an hek tirh che khan, Speaker in min disqualify anih chuan Court ah kan kal nghal ang tih kha i sawi kha a ni a. Speaker thutlukna chu a lo awm ta a. A hmaa i thu kha sawhsawn in mipui court lama kal kha in thlang ta a ni. Khami kawngah khan in party tan pawh risk a sang hle a. Tling lo thei i ni a, thutlukna siam kha harsa i ti em?
Pu Duhoma chuan, min ban hma, min ban dawn tih ka han hriat ah khan, min ban chuan court ah kan kal ang a, ‘court ah kan khing ang’ tih kha ka sawi a. MNF ho kha ka tihderh ve a ni, tih derh phawt kha ka duh a, chuvang chuan mi pakhat in complaint kha siam theih anih laiin, MLA 12 ngawt mai khan min han hek ta a. Min han hek hnu a, Speaker in thutlukna a siam tuk mai ah khan in High Court ah kan lo appeal palh anih pawh a, an lo bawhzuina tur kha an lo thehtlut leh ngal a ni. Khata tang khan an rilru kha court a kal tura min ngaih avangin tih khawmuan dan an ngaihtuah dawn tih kha a chiang reng mai a. Kan tum tak chu mipui court a kal kha a ni a. Kan hruaitute nen kan han sawi ho a, court a kal chak pawl kha chu kan awm tho mai. A chhan chu thiam kan chan dawn avang khan, India Constitution hial a khawih dawn avangin Court a kal kha tha kan ti a. Nimahsela, tun term chhung hian Supreme Court ah te an appeal leh an tum dawn a. Thutlukna a awm har dawn si a, tiin lungrual takin mipui court a kal kan ti tlu ta a ni. Tin, Serchhip bial mipui 2019 ngaihdan kan la a, 100% deuh tho in mipui court a kal kha an duh a ni a, chu chu kan thutlukna pawh a ni nghal a ni.
Hemi mipui court a kal tura thutlukna in siam khan AMC inthlan lo ni dawn bawk nen, he inthlan hi mipuite’n Kum 2023 MLA General Election lo awm turah vote inthlak kep a ni, tiin in campaign kha a ni a. Nangmah ngei pawhin i thusawi ah i sawi tel a, hei hian in Kum 2023 MLA inthlan lo awm turah eng angin nge nghawng a neih ang. In party tan that phah viau turin i ngai tihna em ni?
E, ngai teh reng mai. Football khel ta ila, final lut tur chuan Semi final a chak phawt a ngai a. Semi final a kan chak lo chuan final kan khel thei lova. Chutiang bawkin politics pawh chu tho chu a ni. Tichuan, 2018 MLA inthlan ah khan Semi Final ah kan chak a, oppostion party lian ber vawiin ah pawh kan ni a, kan chak ta a. AMC inthlan ah pawh Semi Final ah kan chak leh Bye election ah kan chak leh bawk a. Semi Final ah vawithum kan chak ta a ni. Tunah chuan chiang takin Final kan lut ta a. Kum 2023 MLA Election ah chuan ZPM leh MNF te inbei tur kan ni a, chutah chuan tuna bye election result han thlir hian Serchhip bial mipui mai ni lo, zoram pum mipui ngaihdan hi a tehna thui tak a hman theih in ka ring a. Chutah chuan MNF hi inthlan leh hunah pawh sorkar tir tawh lova, ZPM tan malsawmna inher chhuah tir na tur a ni dawn a, he hian kan bial ah chuah ni lo, zoram pumpui ah ZPM chu a chawisangin, hma kan sawn hle dawn a. Tun atanga rei lote ah hian tlangtin leh mualtin ah ZPM hian lawmluh tur tam tak kan hmu dawn a ni. Han sawi tel hram ka duh chu, he bye election hi keima mimal hnehna ni lovin, bial mipuite hnehna a ni. Kum 2018 election ah pawh khan kan party chu eng tham mah kan ni lo, mipui chakna kha kan chakna a ni a. Tunah pawh hian kan party chakna a ni reng reng lova, Serchhip bial mipui neutral te, min khawngaihtu te avangin chakna kan chang a. Chuvang chuan mipui hnehna kan ti lo thei lo a ni. He bial ah hian ‘Tunge chak ang’ an tih pawhin ‘Pu Duhoma hi a chak ang’ ti reng reng an awm lo, ‘Kan chak ang’ tih vek a ni. Hei hian ka mimal a ka chakna ni lovin, kan pawl te leh min support tute zawng zawng hian a neitu thinglung hi kan pu tlang vek a ni. Pu Duha a chak ang, tih hi an hmang ngai lova. Kan chak ang tih tawngkam hi kan hmang a, neitu nihna a changtu nihna thinlung hi kan party worker leh min support tu te hian an nei a ni. A chungah nasa takin lawmthu ka sawi a ni.
Serchhip leh Thenzawl a campaign kick off in neih lai khan - Serchhip bial chu ram lai a ni a, ramlai malsawmna hmanga Mizoram khai chhuah kan tum dawn ani, tiin mipuite vote turin i sawm a ni a. Tunah thlan tlin ilo ni ta a, chu malsawmna chu thlen tir turin eng angin nge hmalak i tum?
Kan rulling lamin thutiam an neih ho kha kan bawhzui ang a. Kan Education certificate xerox copy pe ho zawng zawng khan ka hnenah rawn in report se ka duh a. Muster roll an tiam te, transfer an tiam te, housing loan an tiam te, nuai thum sem an tiam te leh police a lut tura an tiam te an awm a. Chuvang chuan khang kha rulling lam in min tiamkam anih avangin kan bawhzui ang a, Serchhip bial hi Mizoram a development chak ber na tur, bial hausa ber tur leh sorkar hnathawk tam na ber tur kan ni dawn a ni. Bial vannei tak kan ni dawn a, he bye election hi a bial hian kan thatpui hle dawn a ni. Khami bawhzui kha chu kan ti ang a, kan sorkar pawhin Pathian leh mipui hmaa an thutiam a ni a, min tihhlawhtlin sak turah kan ngai a ni.
Therhlo leh thlemna tam tak karah mipui nawlpui hian dik takin an chhia leh tha hriatna an hmang tih chiang takin a lang a. Chuvangin, Serchhip bial mipuite kan puitlin zia leh zofate’n he bye election hi an ngaihven tih hre reng a, dikna dinpui ngam in mipui nawlpui hian ngaihtuahna kan seng a. Chuvang chuan bial mipuite hi kan fakawm in, kan chhuanawm a entawn tlak kan ti a a ni. Chumi anih avang tak chuan kei hi ZPM MLA mai kan ni dawn lova, bial pumpui MLA ka ni dawn a. Min vote lo tute tan pawh an aiawh tu ka ni, ZPM MLA ang kan ni dawn lova, mipui aiawh zawng zawng tan MLA ka ni dawn a. He bial aiawh hian ka ding zel dawn a. Inthlahrung hauh lova, bial mipuite inpawh taka ke kan pen a ngai dawn ani.
Serchhip A/C Bye-Election ah hian MNF + Congress+BJP+PC +Independent Candidates te vote hmuh belhkhawm (8254 votes) in Pu Duhawma votes hmuh zat (8629 votes) chu 375 votes in a phalo a ni.
Post a Comment