Lawngtlai, 2nd May,2021 : 26-Serchhip (ST) Assembly Constituency Bye Election neih zawh takah State sorkar a rulling lai Candidate Pu Vanlalzawma vanduai zawk ah a tang.
 |
April 17,2021 zing dar 7:00 atang tlai Dar 7:00pm thleng khan vote thlak a ni a. Bye Election hi Zoram mipuite ngaihven a hlawh hle a. Serchhip bial mipuite pawhin vote an thlak tha hle. He Bial ah hian Voter 19,520 awmin vote tla zawng zawng hi 16,376 niin 83.85% zet vote hi a tla a ni.
Serchhip Bye Election ah hian Candidate paruk (6) an awm a. Hetiang hi an vote hmuh dan a ni.
Pu Lalduhoma (ZPM) - 8269
Pu Vanlalzawma (MNF) - 5319
Pu Pc.Laltlansanga (INC) - 2604
Pu Lalhriatrenga Chhangte (BJP) -250
Pu Eden Ramhluna (IND) - 43
Pu Vanlalruata (MPC) - 38
NOTA - 32
Kum 2018 MLA General Election ah khan he Bial ah hian Pu Lalduhoma chuan Vote 5481 a hmu a, amah hnaih ber tu Pu Lal Thanhawla khan Vote 5071 a hmu thung a, an inthlauhna hi Vote 410 a ni. Kum 2018 MLA General Election ah khan MNF party chu pathumna niin an Candidate Pu C.Lalramzauva khan vote 4313 a hmu ve thung a. Hemi tum hian candidate pasarih an awm thung a ni.
Pu Lalduhoma chu MNF MLA 12 ten Speaker Pu Lalrinliana Sailo hnenah hekna an thehlut a. Tichuan, Ni 27.November,2020 khan Pu Lalrinliana Sailo hian chu an hekna thutlukna chu a puang ta a. Pu Lalduhoma chu Mizoram Legislative Assembly memebr anihna chu hlih sak a lo ni ta a ni. Hetiang anih takah chuan Ram Danpui (Constitution of India) Article 190(3) -na in a sawi angin, a thuthmun (seat) pawh a ruak tih a puang bawk a. Tichuan, March 16,2021 khan Serchhip Bial Bye Election neih hun tur puan a ni a. April 17.2021 a vote thlak in Ni 2.May,2021 a vote chhiar tur tih anih angin, vawiin chawhma lam khan vote te chhiar a ni a. Kum 2018 MLA Election a thlan tlin tak Pu Lalduhoma ZPM candidate chu hnen taka thlan tlin a lo ni ta a ni.
MNF party te hi tun tum Bye election ah hian 2018 MLA General Election aiin an dinhmun a sang hret a. Congress erawh an tla hniam ve thung a ni.
MNF party candidate Pu Vanlalzawma chuan, "Kan sorkar hnu inthlan awm zawng zawngah kan la chak vek a. Serchhip bialah chak leh ila kan chapo lutuk palh thei a, kan inenfiah nan Pathianin min fiah a ni. Pathianin hun a tihah he lai bialah hian kan la chak em em ang."
"MNF in party mala vote kan hmuh ṭhat ber ṭum a ni a. Party anga kan ṭanrual ṭhat ber ṭum a ni bawk a. He lai bial hi MNF khawpuiah kan la siam dawn a ni. Min lo vote tute zawng zawng chungah thinlung takin lawmthu ka sawi a, Party workers zawng zawngte chungah lawmthu ka sawi bawk a ni. Min pui tura hmun hrang hrang aṭanga lokal te chungah lawmthu ka sawi bawk a ni. He khawtlang tan hian theihtawp i chhuah chhunzawm zel ang u," a ti a. Serchhip Bye election neih zawh taka thlan tlin tak Pu Lalduhoma pawh a lawmpui thu a sawi bawk.
Tun tum Bye Election ah hian Pu Lalduhoma ZPM candidate chuan Vote 8269 hmu in, Pu Vanlalzawma MNF candidate hian Vote 5319 a hmu a, an inthlauhna hi Vote 2950 a ni. Pu PC.Laltlansanga INC hi pathumna niin Vote 2604 a hmu a, BJP Candidate Pu Lalhriatrenga Chhangte hian vote 250 a hmu ve thung a. Pu Eden Ramhluna Independent candidate hian vote 43 a rawn hmu ve bawk a, MPC candidate Pu Vanlalruata aiin a hmusang zawk a. Pu Vanlalruata Kum 2018 Election vote a hmuh aiin vote 9 in a hmu tam a, vote 38 a hmu a. NOTA ah hian Vote 32 a tla ve thung a ni.
Post a Comment