Red Devils tantu mipui 200 velin Old Trafford chhung leh pawnah club neitute an duh lohzia lantir nan inkhel thei lo turin hma an la a, Manchester United leh Liverpool inkhelh hun sawn hlat a nih phah.
United-in an hmelma kumhlun Liverpool mikhualin India sana-ah chawlhni zan dar 9:00 a inkhel tur an ni a. Mipuiin an tihbuai tlat avangin an khel thei lova, zan dar 10:05 khal inkhel lo tur leh a hun dawn turin thutlukna an siam fel.
Engtikah nge an inkhelh dawn tih an la tichiang thei lova, he inkhel ah hian Premier Leaque-a pahnihna United an tlawm anih chuan season li chhunga a vawithum nan Manchester City an Champion dawn a ni.
Premier Leaque chuan ; “Premier Leaque, club pahnih, police leh tualchhunga thuneitute inrawn khawm a ni a, sawn mai turin thu kan titlu a ni,” a ti.
Police sawi dan chuan dodaltu mipui nena an inepna ah officer pahnihin hliam an tur a. Premier Leaque chanchinah mipuiin inkhel tur an dodal avanga a hun sawn hlat anih vawikhatna a ni.
Kum 1987 khan Newton Health tih hmingpuin Manchester United hi a din a, an kawr rawng hmasa ber atan a hring leh rangkachak rawng an hmang a. Kum 2010 atang khan United neitu Glazer chhungkua dodalin club tantu mipuin hma an la tawh a, rawng atan a hring leh rangkachak rawng inpawlh a hmang a ni.
A hring leh rangkachak rawng inpawlh hmang zui zelin India sanah chawlhni zan Dar 6:30 atangin Old Trafford-ah United tantuten club neitute laka an lungawi lohna leh thinrimna an lantir tan a, inkhelh hun thlengn an bansan duh lo a ni.
Thla liam ta khan UEFA hnuaia European club inelna atanga inla hrangin club lianten European Super Leaque din an tum tih an puang a, a dintu club 12 zingah United an tel a. A hnuah inhnukdawk leh nghal mah se club neitute laka lungawi lohna nei sa tawh mipui an thinrim tak zet a. United tantute hian an ti mai mai lo viau a, coronavirus leng avangin khelmual chhungah mipui luh phal a ni lova. Chuti chungin vengtute su tlangin Old Trafford khelmual phul chungah mipui eng emaw zat an lut a, an dodalna an lantir a ni.
Hnawtchhuak leh mah se, a then chu phul chungah an kir leh tho a, inkhelh theih rual lovin khelmual an luah tlat a, clun tana mualpho thlak takin an lungawi lohna an tilang a ni.
PremierLeaque chuan khelmual thlenga mipui an lut thei chu tha lo a ti hle a. Tute tan pawh Old Trafford-a thil thlengah hian venhimna leh mipui himna tur ngaihtuah ngun a pawimawhzia a chiang a ni. Mipui lungawi lohna kan hrethiam in an rilru natna kan zah em em a, chutih rualin tharum thawha an chet dan leh dan bawhchhiaa thil an tihchhiat bakah, kal phal lohna thlengin an lut tlang a, chiang takin Covid-19 inkaihhruaina dan an bawhchhia a. Buaina a hmehmih anih theih nan dinhmun hlauhawm taka awm chunga Police leh thawktute tan hma lak a ngai kha pawi kan ti a, heng thil hian Football-ah hmun a chang ngai tur a ni lo,” tiin thleng an dem thu an sawi lang bawk.
Post a Comment