Lawngtlai, 03.05.2021: May ni 2, 2021 (Pathianni) chhun dar 12:00 bawr vel khan lirthei, MZ-07 3710 (Grand i10) chu COVID-19 vanga inkhuahkhirhna kalpui meka Lawngtlai Bazar Venga Areopagy-a COVID-19 Executive Duty-te'n lo phar din an tum a. Mahse, duty-te hi pawisa lovin, an lehkha ken chu motor aṭanga theh chhuakin an tlan tlang lui a; an lo let lamah pawh tihdin ngam loh khawpa chakin an tlan tlang lui leh bawk a. VLTF pass ni awm taka lehkha an rawn theh chhuah chu duty-te'n en chiangin, ran hrisel leh hrisel loh enfiahna (certificate of soundness) a lo ni a.
Hetia sawrkarin COVID-19 laka himna atana inkhuahkhirhna a siam zawm lo va, COVID-19 Executive Duty-te namnul leh tham lo taka an che hi The Mizoram (Containment and Prevention of the Spread of COVID-19) Act, 2020 bawhchhiatna a nih avangin dan angin hma lak nghal a ni a. Lirthei registration number aṭangin Pu Lalramngaia, College Veng chu lirthei neitu a ni tih chhui chhuakin, lirthei hi a fapain a khalh chhuak tih hriat a ni a.
Vawiin khan Lawngtlai District Police te chuan Pu Lalramngaia te pafa hi Thana-ah lain, dan angin hma lak chhunzawm zel a ni a. COVID-19 chungchanga dan ding lai tlawh chhanin, *COVID-19 laka himna tura sawrkar dan siamte zawm lo leh danin a phut anga sawrkar official-te thawhpui ṭha duh lo* tia charge-in, pawisa chawitir an ni a. Lirthei khalhtu hi kum tling lo a la nih bawk avangin, MV Act hnuaiah hremna lek khawh a ni bawk ang.
COVID-19 laka him nana lockdown kalpui mekah Lawngtlai khawpui chhungah COVID-19 Executive Duty-te ngawrh takin an duty mek a. Phalna nei lova pawn chhuak te, mask vuah lo leh social distancing zawm ṭha lo bakah, sawrkarin inkaihhruaina a siam hrang hrang bawhchhiate chu manin, dan angin an hrem zel a. Lawngtlai mipuite chu mahni leh mi dangte him nana ṭha taka dan zawm turin District thuneitute chuan an ngen a ni.
Post a Comment