Lawngtlai East bialtu MLA Pu H. Biakzaua'n Lawngtlai Town chhung VLTF te a tlawh a, chhuanchham leh VLTF tan ṭanpuina a pe
Lawngtlai 29.05.2021 : Vawiin May 29, 2021 khan Lawngtlai East Bialtu MLA Pu H. Biakzaua chuan Lawngtlai Town chhunga VLTF te tlawhin hun a hmang a, Lockdown avanga veng tinin harsatna kan tawhte a hmunah a enfiah.
Vawiina MLA Pu H. Biakzaua'n Lawngtlai Town chhunga VLTF te a tlawhnaah hian Town chhunga VLTF pariatte hnenah chhungkaw 40 ṭheuhte hnena pek tur ₹.40,000 ṭheuh a pe a, hei hi veng tina VLTF ten an veng chhunga ṭanpui ngai an thlanchhuah chhungkaw 40 te hnenah ₹. 1,000 ṭheuh an pe ang. Hei bakah hian veng tina VLTF duty te hnenah ₹.5,000 ṭheuh leh Sanitizer leh Facemask ṭhahnem tak a pe bawk. MLA Pu H. Biakzaua hian Central YLA hnenah ₹. 20,000 a pe bawk a ni.
Lawngtlai East bialtu MLA leh Agriculture Board Vice Chairman Pu H. Biakzaua chuan veng tina VLTF duty te chungah lawmthu a sawi a, hlawh leh beisei nei miah lova mipui him nana an thawk chhuak ṭhin chu zahawm a ti a, ṭhahnemngai taka mipui himna an ni tih hria a, pen chhuak zel turin a chah bawk a ni. Tin, bial chhungah chhuamchham leh ṭanpui ngai harsa an awm a nih chuan a hnenah inthlahrung lova sawi zel turin bial chhung mipuite a chah bawk.
MLA Pu H. Biakzaua hian tun hnai deuh khan Town chhung VLTF te hnenah ₹. 10,000 ṭheuh a lo pe tawh bawk a ni.
Post a Comment