Lawngtlai 13.05.2021 : Nimin ni 12.05.2021 hian Lai Autonomous District Council a Chief Executive Member Pu Manghmunga Chinzah kaihhruaina hnuaiah LADC Disaster Management & Relief Committee neih a ni a. Lai Autonomous District Council a sorkar hna nghet thawkte an ni khat hlawh thawh tura ngen ni se an ti a. Tin, Member of District Council (MDC) te Covid-19 dona atan an ni hnih hlawh dil nise tih an rel.
Lai Autonomous District Council DM&R committee chuan, Lai District chhunga Village Level Task Force te tanpuina pek ni se an ti a. Tin, medical lam te an hnathawhna kawngah hah leh chauh pawh sawi lova, theihtawp an chhuahna chu lawmawm an ti a. Chumi rual chuan indaih zawka hna an thawh theihna turin Lab.Technician pathum te chu thla thum chhung atan rawih sak ni se an ti bawk.
Tunlai hian Lawngtlai District ah Covid-19 Vaccine pek hna chu district chhungah kalpui mek zel a ni a. Hemi kawngah pawh hian District Council chuan a theih ang ang a tanpui ve ni se an ti bawk a. Ei leh bar kawngah harsatna tawk an awm anih chuan theih ang ang a buaipui a, chhawmdawlna hna thawh ni se an ti bawk a.Covid-19 dona atan LADC a Revenue Collection atangin cheng Nuai 2 ngaihtuah tura tih an ni bawk.
Vawiin meeting hian Kum kalta a CEM Relief Committee on Covid-19 chu kalpui chhunzawm zel nise a ti a. He Committee Secretary atan Pu Thathluna Chinzah, DM&R chu ruat a ni a. He hri dona atana sum leh pai thawh thei kan awm anih pawhin engtik lai pawhin a pek theih reng bawk ani.
Post a Comment