Lawngtlai 16.05.2021 : Nimin May ni 15, 2021 khan ZMC RT-PCR laboratory-ah COVID-19 positive 66 hmuhchhuah a ni a. TrueNAT laboratory-a sample test zingah COVID-19 positive 11 a awm bawk a, Rapid Antigen Test hmanga COVID-19 positive hmuhchhuah thar 104 an awm thung a ni.
Nimin khan sample test zawng zawng hi mi 2465 a ni a, chung zingah chuan positive 181 hmuhchhuah thar an awm bawk a. Tin, nimin vek khan positive enkawl lai mi 87 chu Covid-19 positive enkawlna hmun atanga chhuahtir an ni thung.
Tun dinhmun ah hian Mizoram-ah hian positive enkawl mek 2158 an awm mek a. Covid-19 avanga nunna chan mi 24 an awm thung. Hri a lo len atangin hri kai mi 8680 an awm a. Heng zinga mi 5629 hi mipa an ni a, hmeichhia 3051 an ni a. Dam taka chhuak hi 6498 an ni.
Mizoram a District 11 ah hri vei enkawl lai an awm vek a. Aizawl District ah 1562, Lunglei District 164, Siaha District 40, Champhai District 43, Kolasib District 115, Serchhip District 123, Lawngtlai District 33, Mamit District 20, Khawzawl District 27, Hnahthial District 1 leh Saitual District 30 -te enkawl mek an ni.
Covid-19 hri kai hmuhchhuah thar zinga 66 hi ZMC-a RT-PCR laboratory-a hmuhchhuah an ni a. Lunglei district a Tlabung khua ami hri kai hmuhchhuah a tam hle a. Tlabung khua a veng 7-a hri kai hmuhchhuah zat chu 37 a ni a, Bazar Vengah ringawt 19 hmuhchhuah a ni. Aizawl khawpui chhunga veng 10 bakah Sairang leh Chhingchhip khuaah hri kai hmuhchhuah a ni a, Chanmari vengah tam berin 6 an awm a, Falkland vengah 3 awmin Govt Complex-ah pahnih a awm a ni. Lunglei district-a Nunsury khuaah hri kai 6 hmuhchhuah a ni bawk.
TrueNAT khawl hmanga hmuhchhuah hi 11 awmin an zinga 8 chu Lunglei district ami an ni a, Champhai, Kolasib leh Khawzawl district-ah pakhat theuh hmuhchhuah a awm bawk.
Rapid Antigen Test hmanga hmuhchhuah hi 104 a ni a, 1 chauh hi Lengpui tumhmuna hmuhchhuah a ni. Aizawl khawpui chhunga hmuhchhuah tam zualna vengte chu – hri kai 11 hmuhchhuahna Tuikual South, Hunthar Veng 11 bawk, Venghlui 9, Ramthar 7, Tuikual North 5, Bethlehem Veng 5, Durtlang Leitan leh Central Jail Veng Tuivamit-ah 4 ve ve te an ni a. Serchhip district a Chhingchhip khuaah hri kai 6 hmuhchhuah a ni bawk.
Post a Comment