Dt 14.April, 2021 khan Lawngtlai District MJA te chuan Press Club Lawngtlai ah Zotrek member pahnih Romalsawma Hmar, Mission Veng leh Vanromawia, Bawngkawn Aizawl te chu lo dawngsawngin hun an hmang.
Lawngtlai District MJA President Pu Lalngheta Ralte chuan, an mahni lo lawmna thu sawiin, an thil tih chu thalaite tan chona lian tak a ni a. An thil tum te an tih hlawhtlin ngei theihna turin duhsakna a hlan bawk a ni.
Romalsawma (Roma) chuan hemi atana an inbuatsaihna atan nitin km 15 atanga 20 te a walk thin thu a sawi a, harsatna awm lova an tum an hlawhtlin theih nan an thil tih hlutsaktute tawngtaipui turin a sawm a, thil harsa leh khirhkhan paltlang tura rilru leh taksa inbuatsaihna hian mihring nunah hmalam pan tura tumruhna leh inrintawkna a thlen thin tih sawiin, "rilru leh taksa hriselna hi keimahni ngeiin kan thawhchhuah a ngai tih hi ka thalai puite ka chah duh a ni" a ti.
Thalaite hian tumruhna leh huaisenna hi kan neih a ngai a. Kan taksa hi hrisel taka kan vawn a ngai a, anih loh chuan rilru lamah harsatna kan nei thei a. Hrisel tur chuan keimahni kan pawimawh ber a. Thiltum lian tak kan nei a, chu chuan kawng dik ah min hruai thleng a ni, a ti bawk.
Roma leh Vana hian Kumin January 30-31 khan Aizawl atangin ke bawkin Kolasib (78 Km) thleng an lokal tawh bawk a ni. Aizawl to Siaha ke a kal thleng tur hian inbuatsaihna nasa tak an neih thu an sawi a. Kum 2020 December thla atang khan inbuatsaihna hi an kalpui tawh thu an sawi a. Aizawl atanga Siaha pan tur hian Kilometer 301 zet kal a ngai a ni.
Zotrek member pahnih te hi April 6,2021 khan Aizawl rawn chhuahsanin khaw 39 paltlangin Ni 7 chhung Lawngtlai an rawn thlenna tur hian ke in an kal a. Aizawl atanga Lawngtlai thleng tur hian harsatna hrang hrang tawk mahse, an thil tih tum chu a hlawhtlin ngei theihna turin theihtawp an chhuah thu an sawi a. Khaw kar kawnga an mahni duhsaktu te chungah lawmthu an sawi bawk a ni. Lawngtlai an rawn thlen hian Lawngtlai District Rifle Association ten Aeropagy ah an hmuak a. Hemi hnu hian Lawngtlai District MJA Press Club ah hun hmang leh in, MJA te hian MJA shash leh pawisa an hlan.
Roma leh Vana te hian rucksack kg 20 vel ve ve an ak a, gym kal ten an ei thin chakna pai tam, Fastcharge Instant Energy, Insta hydrate leh BCAA an pai tel bawk.
Post a Comment