Syria chuan May ni 26,2021 hian Presidential Election an neih tur thu an Parliament speaker-in vawiin khan a puang. Syria ramah hian tualchhung indona a nasat avangin Kum 10 dawn ‘Civil war’ an lo nei tawh a ni.
Indona in a tihbuai hnua President thlanna an neih vawihnihna tur a ni a. President ni lai Bashar Al-Assad chuan thuneihna a neih chhunzawm beisei tho a ni.
Hamouda Sabbagh, Speaker of the Parliament chuan thuchhuah a siamah Syria ram mi leh sa ramdanga awmten an awmna ram embassy-ah vote an thlak theih tur thu a puang a. He inthlanna a lo awm tura ding duh zawng zawngte chuan thawhtanni atangin hming a pek theih dawn niin a tarlang bawk.
Candidate-te chu tunhnaia Kum 10 chhung Syria rama awmte chauh an ni tur a ni a. Sorkar eptu hruaitu, ramdanga hnawhchhuahte an din theih lohna turin he dan hi an zam a ni. Tin, parliament-a member 35 nei chin an ni tur tih a ni leh a, Assad-a party-in an awh hneh leh hle bawk a ni.
Syria ram-ah hian Kum 10 chhung ‘Civil War’ an lo neih tawh avang hian mi 3,88,000-in nunna an chan tawh a, ramchhunga mipui cheng chanve vel lai chu an khawsakna hmun atangin an awm darh phah nghe nghe a ni.
Kum 2000 khan Syria ram President Hafez hi a boral a. A boral hnu hian a fapa Assad-a hian thuneihna hi a keng chhunzawm a. Tun tum inthlanna lo awm turah hian a din tur thu mumal takin a la sawi lo a ni.
Kum 2012 khan an ram rorelna dan siam anih khan President in term hnih chhung ro a rel theih ang tih a ni a. Term khat atan hian Kum 7 chhung rorelna President in a kaihruai dawn a ni.
Post a Comment