Chhattisgarh state khawpui Raipur-ah Covid-19 vei enkawlna damdawi inah nimin (17.04.2021) khan kangmei a chhuak a, mi panga (5) in nunna an chan.
Raipur-a Rajdhani damdawi Inah hian nimin tlai dar 5 vel khan a chhawng khatna atangin kangmei hi a chhuak tan a. Kangmei chhuah lai hian damlo mi 34 enkawl mek an ni a, ICU-ah mi 9 an awm mek niin thuneitute’n an sawi.
Raipur collector & District magistrate Dr Bharathi Dassan chuan kangmei chhuah chhan zirchiang tur leh Raipur District zawng zawnga Covid-19 damlo enkawlna damdawi inte chu kangmei chhuak tur venhimna a that tawk leh tawk loh enfiah vek turin thuchhuah a siam.
Chhattisgarh state Chief Minister Bhupesh Baghel chuan mitthi chhungte hnenah zangnadawmna cheng nuai 4 theuh pek an nih tur thu a puang bawk a ni.
Union Health Ministry chhinchhiah dan chuan Chhattisgarh-ah hian Covid-19 kai thar tunhnaiah an pung chak hle a. Kai mek 1,24,303 an awm mek a, mi 5,580-in an thihpui bawk a ni.
Post a Comment