April ni 24,2021 a neih tur ASEAN summit-ah Mynamar sipai hotupa Min Aung Hlaing a tel tur thu Thai Foreign Ministry chuan an puang.
February Ni 1-a civil rorelna sipaiten an hnehchhuh hnua ram aiawha a zinchhuah vawikhatna tur a ni. Ram 10 telna ASEAN hi Jakarta-ah neih a ni ang.
Unity Government thuneitute chuan Hlaing-a zin tur hi an duh lo hle a. An rama remna leh muanna a awm theihna turin ram thenawmten sipai roreltute aiah sorkar tharte chu dawr zawk tur an nih thu an tarlang bawk a ni.
ASEAN hian Myanmar rama Aung San Suu Kyi-i sorkarna sipaiten an hnehchhuh hnu hian an rama buaina chhuak thin tihtawpna turin kawng hrang hrangin hmalak an lo tum tawh thin a. Hemi kawnga inkawmhona neih tura ruahmanna an siamte pawh sipaite roreltute hian an lo hnarsak tawh thin a. Tun tumah erawh chuan an hotupa ber Min Aung Hlaing-a chu he summit-ah hian a tel dawn ta a ni.
National Unity Government (NUG) Foreign Affairs Deputy Minister Moe Zaw Oo chuan, “ASEAN hian Myanmar ramchhung inrelbawlna siamthatna chungchangah NUG min rawn lo anih chuan an hlawhchham ang, a chhan chu keini hi ramchhung mipuite’n min thlawp a, kan rorelna min pawmpui a ni,” a ti.
National Unity Government-te hian an sorkar chu ramdang pawmpuina an ngen mek a. ASEAN meeting neihna turah Min Aung Hlaing aia sawm an inngiat bawk a ni.
Post a Comment