Nilaini khan Assam state-a Silchar Airport-ah passenger 300 chuang chuan Covid-19 test nei duh lovin test center atangin an tlanbo.
Assam sorkar chuan coronavirus hripui leng thawhhnihna a thlen tak avangin thlawhtheihna hmanga zin zawng zawngte chu Rapid Antigen Test (RAT) leh RT-PCR test nei zel turin ruahmanna a siam a. Airport hi a tet deuh avangin a bulhnaia Tikol model hospital-ah test nei turin zin veivakte an thawn thin a ni.,
Sumit Sattawan, ADC, Health Cachar District chuan, ‘Nilaini khan Silchar-ah mi 690 vel thlawhtheihna hmangin an tumkhawm a. Mi thenkhat chu hmundanga thlawkchhuak leh tur an nih vangin test an ni lo a. Mi 189 test zingah 6 an positive a, midang 300 erawh chu test duh lovin an tlanchhia a. An tlanchhiat nachhan leh tlanchhiate chu chhuizui nghal mek ani,’tiin a sawi.
ADC Sattawan hian passenger-te chu testing centre-ah hian airport thuneitute’n an buatsaih sa bus emaw anmahni lirthei hmangin an kal mai thin thu a sawi a. Mahni lirthei hmanga kalte hi a khalhtute chhinchhiah vek an ni a, chhuichhuah vat an nih tur thu a sawi bawk.
Cachar District-ah hian kai thar 48 hmuhchhuah thar an ni a, Assam state hian vei mek 9,048 an nei a ni.
Post a Comment