Myanmar ram buaina thlasana, an sahimna zawnga Mizorama rawn tlan lut raltlan mi 4500 an chuang tawh.
Sipaiin mipui thlan sorkar an pawng lakna dodalna vanga buaina hi reh lam aiin zual lam a pan zawk a. Myanmar atanga Mizorama rawn tlan nitin an awm belh a. Darkar 24 liamta chhungin mi 100 chuang Mizoram-ah an rawn tlan lut niin thudawn a ni a Heng mite hi District Capital thenkhatah an tlan lut niin thudawn a ni.
Myanmar raltlan zinga a tam zawk chu Champhai District chhungah an tlan lut a, hriat theih chinah mi 2400 chuang Champhai District chhungah raltlan an awm tawn nia thudawn a ni.
Lawngtlai District chhungah mi 780 an tlan lut tawh a, Myanmar ramri hrul tho Siaha District chhungah mi 465 an tlan lut tawh bawk.
State Capital Aizawl District chhungah raltlan mi 410 chuang an awm tawh a. Aizawl ah hian raltlante awm khawmna tur ruahman a ni a, raltlan tam zawk an khawsa mek a ni.
Raltlan te luhna dang Lunglei District ah mi 20 dawn an awm tawh a. Hnahthial District ah 280 chuang, Serchhip ah 50 chuang, Kolasib ah mi 30 chuang leh Saitual District chhungah raltlan mi 40 chuang an awm tawh a ni. Myanmar raltlan hi a zat chiang taka hriat theih ni lo mahse, tun thleng hian mi 4500 chuang raltlan an awm tawh nia ngha a ni.
Heng Myanmar raltlan zingah hian MP leh MLA 14 te pawh an awm tih hriat a ni a. An zingah hian hmeichhia pawh an tel bawk a ni.
Post a Comment