Vawiin April,23 Lai Student Association dincham vawi 63-na a lo ni ve leh ta reng mai.
Lai Students' Association hi 23.April,1958 khan Shillong-a Pawi (Lai) leh Lakher (Mara) zirlaite'n Regional Students' Association (RSA) tiin bul tanin an lo din a. Khang hunlai a kan hruaitu tam zawk ten mual min liamsan tawh a. Vawiin thleng a min la dampui (hriat theih chin) chu Dr.RT.Hnialum hi a ni.Vawiin LSA dincham ah hian zahna chibai I buk ang u.
RSA chu Shillong ah din ni mahse, an Hqrs erawh Lunglei ani thung. Kum 1962 khan Hqrs chu Lawngtlai ah sawn ani leh ta a. Tichuan, Kum 1966 khan Mizoram buai avangin Lawngtlai ah school pawh an kai mumal theih tak loh avangin, Hqrs chu Shillong ah sawn an rawt leh ta a. Kum 1967 ah Hqrs awmna chu sawn a ni leh ta ani.
Kum 1968 khan Regional Students Association tih chu zirlai te rilru ah thlak duhna a lo lang ta a. Mahni Hnam hming chawi ngei a, zirlai pawl din chu tha an tih avangin Pawi-Lakher Students' Association (PLSA) tia thlak a lo ni ta ani.
Hun a lokal zel a, PLSA anga awm reng chu tha tawk lo a ngaihna a lo awm a. Zirlai kalkhawm te chuan PLSA chu thiah a, Lai Students' Association hming pu a, mahni Hnam pual ngei a zirlai pawl din chu tha tihna a lo awm tak avangin Kum 1975 khan PLSA chu Lai Students' Association tia thlak a lo a, vawiin thlengin a hming hi a pu hlen ta a ni. Heng hunlai hi Assam sorkar hnuaia Mizoram pawh a la awm lai anih avangin LSA hian Assam sorkar hnuaiah Firm & Society Registration (114/1958) pawh fel fai takin a nei a, pawl changtlung tak a ni a. Hun eng emaw chen chu Shillong hi Hqrs a ni a. Kum 1992 a Siaha hmuna LSA Gen.Conference neih anih khan LSA Hqrs sawn rawt na a awm ta a. Tichuan, Laifate Jerusalem - Lairam khawpui, Lai Autonomous District Council awmna ngei Lawngtlai chu Hqrs ah sawn a lo ni ta a ni.
Lawngtlai chu a hmunpui ber a lo nih takah chuan ah Hqrs tih hming put pawh chu duhtawk lohna a lo awm leh ta a. Bungtlang 'S' hmun a LSA General Conference neih kum 2005 ni ta in ka hria (hre sual deuh mai thei) khan LSA Gen.Hqrs tia thlak a ni a. Tichuan, Siaha chu Hqrs ah hlankai a lo ni ta a ni.
LSA hi Laifa zirlai te tan a hlu hle mai a. Mahni phak tawkin LSA hi chu ka lo tuipui a, ka lo tul pui ve fo tawh thin a. Vawiin thleng hian ka rilru ah hmun pawimawh tak a la Chang reng a ni. Shillong ah hun eng emaw chen kan lo in hmang a, khang hunlai khan Lai Christian Fellowship te a lo awm bawk a. Kan awm ve chhung kha LSA Sub-Hqrs ah khan Ex-officio in ka awm ve reng bawk a. Tichuan, zirlai te kan chawlhsan hnu in Lawngtlai ah kan lo haw chho a, rin lo leh beisei loh takin LSA Gen.Hqrs ah Gen.Secretary atan thlan ka lo ni ve leh ta hlawl mai a. Khang hunlai te kha ava ngaihawm thin em.
LSA Gen.Hqrs a ka thawhpui Lallianzuala (Zuala) of AOC in mual min liamsan ta a.Kei aia upa, fing leh fel zawk tak tak te kaihhruaina in Gen.Secretary nihna ka chelh ve thei kha ka lawm tak zet a ni. Keini term (2009-2011) khan Hqrs leh Sub-Hqrs te tih nun a ngai e, tiin tuichhak tlangdung te kan fang a, a ngaihawm thin hle mai. Khawtlang ah mawhphurhna ka neih avangin Term khat hi ka hmang zo ve hman ta lova, hun a lokal zel a. Kan hruaitu fel tak tak te duhsakna avangin ka phu loh leh ka lo ngaihtuah ngai loh LSA Gen.Hqrs a ADVISER nihna hial min petu te chungah lawmthu ka sawi bawk a ni.
Vawiin LSA day ah hian LSA hruaitu lo ni tawh te, ni mek te leh member zawng zawngte chibai ka buk vek a che u.
ZIAKTU : ELVIS LALTHANGZUALA
Post a Comment