<Kumbh Mela>


KUMBH MELA 2021 COVID-19 IN A TUAM, HRI THEHDARHTU AN NI ANG EM?


_Religion is the sigh of the oppressed creature, the heart of the heartless world, and the soul of the soulless condition. It the opium of the people_.

           - Karl Mark

Kumbh Mela 2021, Hindu sakhaw dana ni serh bik ni hnih chhung khan mihring nuai 48.51  'royal baths' (shahi snan) ah hian an tel a, Somwati Amavasya puala  April 12 leh Mesh Sankranti pual April 14 belhkhawm a ni. Hetiang taka mihring tam COVID-19 invenna dahbo hmaka an fuankhawm avang khan Haridwar Kumbh Mela a tel zingah COVID-19 hri kai 1,700 aia tam hmuh chhuah tawh an ni. Chung zingah chuan  Hindu puithiam leh sakhaw zuitu tam tak an tel a ni. 


Uttarakhand state pawh hemia avang hian hri kai thar an pun phah hle a, heta tel hi puithiam zingah hri kai an awm nual a, an zingah President of the Akhil Bharatiya Akhada Parishad Narendra Giri chu  COVID-19 vangin  AIIMS-Rishikesh ah dahluh a ni a, Mahamandaleshwar of Maha Nirwani Akhada, Madhya Pradesh Swami Kapil Dev pawh COVID-19 vangin private hospital ah April 13 khan a thi a ni. 


Kumbh Mela neihna hmun zau zawng hi 670 hectares vel a ni a, Haridwar khaw kianga  awm a ni a, Tehri  leh Dehradun district, Uttarakhand chhunga awm niin  Rishikesh pawh a huam tel a ni.  


 Hindu sakhua biak zin (pilgrimage) pawimawh takah Haridwar hmuna  Kumbh Snan hi kum 12 dana neih țhin a ni a, an neih lai hian planet Jupiter chu Aquarius (Kumbh) chhinchhiiahna (sign) angin a awm țhin a ni. 


Mihring  nuai 48.51  he hun pawimawh 'royal baths' (shahi snan) April 12 ah leh Mesh Sankranti  April 14 ni khan an tel a, heta tel te hian COVID-19  inkaihhruaina dan- face masks, social distancing an zawm lo fai vek a ni.


Hindu isakhaw biak zinna (pilgrimage) a tel te hi RT-PCR,  Rapid Antigen Test hmanga endik an ni tih  Haridwar Chief Medical Officer Shambhu Kumar Jha chuan  April 14 khan a sawi. RT-PCR test report  chhuak lo tam tak a la awm a, Kumbh Mela hmuna hri kaiin 2,000 an pel ang tih a sawi.


"Tun thleng hian sadhu 30 te chuan COVID-19 an kai tawh a,heng sadhu te hi eng sadhu pawl (akhada) ami nge an nih sawi loin akhada hrang Niranjini,Juna pawl dang tam tak an tel," tih  NDTV chuan a tar lang. 


Shiv Sena MP Sanjay Raut chuan  Kumbh Mela hmang lo haw te hi COVID-19 hrik pu darhtu an ni thei a, chu chuan "buaina namen lo tak thlentu an ni thei a ni" a ti. 


 Karnataka state Sorkar Haridwar hmuna Kumbh Mela hmang lo haw zawng zawng te chu coronavirus an vei leh vei loh infinfiah vek  tur leh mahniin an inkhung hrang ngei tur a ni, tih hriattirna a ti chhuak.


Kumin hian Kumbh Mela hman rei zawng hi COVID-19 avangin thla khat April 1-30 atan pawh tawi a ni a. Kum danga an lo tih dan țhin pangngaiah chuan  thla li bawr vel lai, January thla laihawl ațanga April thla thleng a awh țhin.


KUMBH MELA

Kumbh hi Sanskrit țawng a ni a, 'inhmukhawm, awmho" tihna a ni. Hindu sakhaw lehkhabuah ah pawh a chuang a, an neih chhan leh a chhehvel chhui thui lo mai ila. Kumbh Mela hmanna lian zual 4 a awm a, lui thianghlim  behchhana hman a ni țhin. 1) Prayagraj /Allahabad - Ganges - Yamuna Saraswati rivers confluence 2)Haridwar - Ganges 3)Nashik - Godavari 4)Ujjain - Shirpa te a ni. Prayag hmuna Mela hman țhinah hian mi 30-50 million vel an tel țhin a, tuna Haridwar Kumbh Mela nen hian an neih hun inkar hi kum 6 in a inhlat a ni. 


TUNGE TEL ȚHIN

Tuna Haridwar Kumbh Mela kum 12 dana neih țhinah hian India ram hmun hrang hranga Hindu sakhaw puithiam leh sakhaw zuitute an tel țhin. An zingah hian lehkhathiam tak tak te, mi hausa, Sorkar hna thawk lian, Chartered accountant, doctor, professor, etc te he "inbual thianghlim" ah hian an tel țhin. Kumin January thla ațang khan tlawhtu mi 25 million an tling tawh a, tunkara an ni serh bik ni hnih chhung khan mi nuai 48.51 an tel a ni. 


ENG VANG NGE

He  tuia inchiah, inbual thianghlim avang hian malsawmna leh hmuingilna dawng tur te, an thil lo tih sual tawh te tlengfai a, ngaihdamna chang tur niin an inring a ni. 


Hindu sakhua hi khawvel major religion zinga mi leh sakhaw upa ber zinga mi a ni. An sakhaw zirtirna leh serh leh sang tam tak a awm. Hetiang taka sakhaw upa an ni chung hian India leh Nepal ramah bak tihtham an awm lo, midang hneh tuma bei țhin (missionary sakhua) ni loa sawi a ni. 



SAKHUA LEH ATNA

Heti luih luiha luia inchiah tura mithiam pui puia ngaih te nen lam hri pui leng kara an phusa mur mur hmuh hian sakhaw dang betu tan chuan "thil atthlak" tak niin a lang a, an tan pawh kan Tumkau ni te hi a ropui viau chuang lo ang. Hmuhnawm lam aiin COVID-19 "super spreader" an nih theih dan ngaihtuah chuan rapthlak lamah a kal zawk a. Mahse an rinna a nih miau avangin dem hleihtheih an ni bik chuang lo. Eng sakhua pawh hian țawngkam mawi lo ni lo se, "bual ât" leh "atchilhtu" hi a nei vek a. Chu chuan mahni sakhua dik leh țha bera hriatna a keng tel bawk si a nih hi. 


HEI VE THUNG HI

Hindu sakhaw betu leh an sadhu ten hri pui leng karah an nunna thap takmeuhin an sual ngaihdamna turin eng pawh huamin India ram hmun hrang hrang ațangin fuankhawm runpui an nei hi demawm hlein a ngaih theih awm e, kawng lehlam zawnga chhut chuan an rinnaa an nghehzia erawh a lang chiang viau thung lawi a. 


Hripui leng karah hlau hlei thei lo leh anih nih, nih huamin Hindu tam tak Ganges luiah inchiah mahse nang leh kei chu midang hri kai darh lo turin "Krista lungpui nghetah ka ding" ti tlatin mahni leh midang te tana malsawmna nih hi kan tih tur a ni dawn lo'm ni? 

Source :NDTV 

ZIAKTU : Huna Kawlni Kawlvawm

Post a Comment

Powered by Blogger.