HRI PUI THAWH HNIHNA ENGTIN NGE ?
Tun anga India ram chhunga hri kai hmuh chhuah thar hi a tlan chak chuan India ram chu kan nasa lo khawp ang le. Hri pui thawk hmasa kiam avangin kiam zel tura ngai ni ngei tur a ni, kan India ram hotuten hri pui thawh hnihna ngaihtuah lek loin Indian vaccine chu ram dangah thawn chhuah runpui an nei chiam a, second wave hian ram chhung a rawn tuam chhah leh nasa mai si a, vaccine siam chhuah pawh hnawhsarum takin PM in a um leh ta a. Eng tak nge India ram hian a tawn dawn tih hi sawi a harsa khawp mai.
Ram chhung sum leh pai dinhmun (economy) in total lockdown a phur zo lo a, a thawh chhuah nei fumfe lo ber hian tapchhak zawl ațangin chak tak takin *lockdown a hun* te kan pawng tih phawng phawng a. Pu L. Malsawma Colney (L) in khaw pakhat tlangvalho a hauhna thu khawchang "khawmhma kung pawha lawn thei ței țui lo khan, i tan siar lak ka huam e, te hi inti thla ringawt zel a," a tih ang deuh kha a ni. Covid-19 vang hian Central leh state Sorkar zawng zawng leiba a pung a, khawvel ram zawng zawng sum leh pai dinhmun tlak chhiat burhna (economic recession) in a tuam mek a, International Monetary Fund (IMF) in a chhut dan chuan India ram leiba kum 2019 a 74% ni kha COVID-19 hri pui leng avangin ram chhung sum leh pai dehchhuah leh chhiah khawn theihna a tlak hniam vek avangin kum 2020 tawpah chuan 90% laiah leibat zat chu a pung chho ta a ni. Khawvel ram dang leibat punna 98% chung lam tam tak an awm bawk. (Business Today 8/4/21)
Mizoram Sorkar pawh India ram chhiah khawn a hniam rual ruala Central grant leh state share sum dawng tlem kan ni a, Mizoram Budget 2021-22 sum hmuhna lam kan en chuan leiba a pun nasatzia te, leiba rulhna tura budget ah dah a tlem lohzia te a chiang khawp mai. Sorkar sum hi amaha lo awm ringawt a ni lo, mipui thawhkhawm, chhiah hrang hrang tling khawm leh a pung nena rulh leh ngai ațanga awm thei chauh a ni.
Chuvangin hri pui laka kan him a pawimawh ang thoin ei leh bar zawnna kan thlah thlam a rem bawk si lo, India hian faisa ringa a ram mipui te a chawm thei ringawt bawk si lo. Lockdown leh ta burh se mi rethei nitin eichawp zawng : inhlawhfa, Bazara țhu, mistiri, taxi pu etc te tan a buaithlak lutuk tih te kan ngaihtuah tel a ngai. Medicical infrastructure kan neih chhiat em avangin pawlawh taka nun a rem lo, kai inring lo, tum lo hian midang fimkhurna nei lo te zarah natna a kai theih a, kan kai mek zel chu anih hi, chuvangin hriselna chauh dah pawimawh a, nitin ei bar zawnna leh khawsakna thlauh thlak der a rem chuang si lo a, insu buai lutuk lo tura kan relfel thiam hi a țul takzet a, he hri hian eng chen nge min la cham chilh dawn lah tumahin an sawi thei bawk si lo.
Ziaktu : Huna Kawlni Kawlvawm
Post a Comment