Vawiin (22.04.2021) hi India ramah Covid-19 hri kai nuai 3 chuang hmuhchhuah an ni a, hei hi hri len hnuah nikhat thilthu-a Covid19 hri kai hmuhchhuah tam ber ni a ni.
Union Health Ministry tarlan danin hri kai hmuhchhuah hi mi 3,14,835 zet niin hemi chhung hian hri vanga thi 2,104 an awm a, hri kai hmuhchhuah tawh zawng zawng hi mi vbch 1 chuang (1,59,30,965) an tlin tawh bakah thihpui pawh mi 1,84,657 an awm tawh a ni. Tun thla bikah April 15 hnu lamah nitin hri kai hmuhchhuah thar hi mi nuai 2 an la chuang vek a, tuna hri kai enkawl mek hi mi 22,91,428 an ni bawk.
Hetih lai hian hri kai enkawl zingah dam lam pan pawh an tlahniam a, nimin thleng khan hri kai dam leh hi 84.46% a nih mek laiin hri kai thihpui hi 1.16% a ni tawh bawk. Nikum August 7 khan India ramah Covid-19 hri kai hi nuai 20 vel an ni a, a hnu lawk August 23 ah nuai 30 niin September 5 ah nuai 40, September 16 ah nuai 50 a kai a, September 28 ah chuan nuai 60 tling lehin October 11 ah nuai 70, October 29 ah nuai 80 a kai bakah November 20-ah nuai 90. December 19-ah vaibelchhe 1 an tling tawh. Kumin April 19 khan vbch 1.50 a chuang leh tawh bawk.
Hetih lai hian Delhi minister hlui AK Walia chu nimin khan COVID-19 vangin a boral. Senior Congress leader leh Delhi sorkara minister hlui hi kum 72 mi niin nimin zing dar 1:30 khan a boral a, Congress hruaitute leh ram hruaitu pawimawh tak takten Laxmi Nagar bialtu MLA hlui hi an ui thu an sawi hlawm.
Post a Comment