Pu PC.Zoramsangliana,Ex-Minister (65) h/o Lalthlamuani,Kannan Veng Aizawl chu Covid-19 kaihhnawih pneumonia Natna avangin vawiin tlai dar 5:20 PM khan SHR-ZMC ah a boral.
April 14,2021 khan Covid-19 a positive tih hmuhchhuah niin, April 15 ah ICU ah dah luh nghal a ni a. Hun eng emaw chen chu SHR-ZMC ICU-ah ventilator nena enkawl anih hnuin vawiin tlai khan a boral ta a ni.
EX-MINISTER PU PC ZORAM SANGLIANA CHANCHIN TLANGPUI
Pu PC Zoram Sangliana hi Pu Vahlira (L) fapa niin May 9, 1956-ah a lo piang a. Pi Lalthlamuani nen inneiin fanu 3 an nei a, Kanan veng, Aizawl-ah an cheng mek a ni.
Mizoram sorkara Minister of State leh Cabinet Minister lo ni tawh thin Pu PC Zoram Sangliana hi MLA atan vawi 5 thlan tlin a lo ni tawh a, hetiang hi MLA atana thlan tlin a lo nih tawh dan a ni :
1987 – Tlungvel Constituency
1989 – Tlungvel Constituency
1993 – Tlungvel Constituency
2008 – Kolasib Constituency
2013 – Kolasib Constituency
Pu PC Zoram Sangliana hi Pu Lal Thanhawla kaihhruai Congress Ministry-ah vawi 3 Minister a ni hman a. Kum 1992 khan term laklawhah Minister of State atan ruat a ni a, GAD, SAD, etc a chang a, kum 1993-a Congress Ministry a lo pian leh khan Minister of State ni zui lehin Sports, etc a chang zui leh a. Kum 2008-2013 chhung khan Cabinet Minister ni lehin, Art & Culture, Transport, etc a chang a, a hmalaknain kum 2010 khan Mizoramin Cheraw hmangin Guiness World Record kan siam nghe nghe.
Pu PC Zoram Sangliana hi Congress Party hruaitu hlun a ni a, Aizawl District Congress Committee (ADCC) President, MPYCC President leh MPCC General Secretary hna hun rei tak a lo chelh tawh a, AICC-ah hun engemaw chen member a ni tawh bawk. Tunah hian MPCC thuneitu sang, Political Affairs Committee (PAC) member a ni mek a ni. Tin, Union Bank of India-ah hun engemawchen chu Board of Directors member a ni tawh bawk.
April 14, 2021 khan COVID-19 a vei a ni tih hriat chhuah a ni a, ZMC-ah phurh phei nghal a ni. Amah hi kal thlak tawh, zunthlum leh thisen sang nei, damdawi chi hrang hranga inenkawl mek a nih bawk avangin a tuar na hle a. Damdawiin a luh zan atangin ventilator hman nghal a ni a, hmasawnna tak tak nei thei lovin April 24, 2021 tlai dar 5:20 khan a boral ta a ni.
Pu PC.Zoramsangliana ruang hi zanin hian ZMC ah dah a la ni ang a. Naktuk zing dar 11;00 Am ah Kannan Veng Multipurpose Community Hall-ah Commissioner Lalzamlova, TC Salvation Army Aizawl in a vui ang. Hemi hnu hian Kannan Veng thlanmual ah vuiliam a ni ang.
---_----------------+----------------------------------------------
Mizoram Chief Minister Pu Zoramthanga pawhin IG kaltlangin a ui thu hetiang hian a tarlang :.
Ram tana kan rawngbawlpui, Pu PC Zoramsangliana (65), Ex-Minister chuan COVID kaihhnawih Pneumonia avangin April 24, 2021(Inrinni) tlai dar 5:20 khan ropuina ramah min kalsan ta!
He thihna hian min ṭhawngin a pawi kan ti takzet a. Kan ram tan theihtawp chhuaha a lo inpek tawhna zawng zawngte theihnghilh theih a nilo ang.
A kalsan tak a nupui leh fanau te; a chhungte leh amah uitu zawng zawngte kan tawrhpui che u a. Pathianin thlamuanin hualhim tlat che u rawh se.
Post a Comment