Kumin chu kum dang zawng aiin chhiatna kan tawk nasa hle mai. Hri leng avangin kum kalta aiin hri vei kan tam a, nunna chan pawh kan awm ta zeuh zeuh mai. Chumai chu ni lovin kangmei kan tuar nasa em em mai bawk a. Ruahtui lah nise, kum dang aiin kan hmun har a, kum dang aiin kan dawng tlem zawk ngei dawn niin a lang bawk.
Kum dangah hetiang em em in tui lamah Mizoram-in harsatna kan tawk ngai meuh lo. Mahse, kumin ah erawh chuan kan duh reng vang pawh ni lovin, tui lamah harsatna kan tawk nasa hle mai. He thil hi political party a inchir theihna tur pawh niin a lang lova. Eng vangin nge kan tui hna te a lo kang chat a, tui in tur kan tlakchham tak tih hi mahni theuh kan inzawh a ngai a ni.
Tunah ram a kang duai duai a, kan ramngaw neih that te pawh a kang nasa hle. Kan hma bak chu, tui ah tun aiin kan harsa ngei dawn a. Kan khawvel sik leh sa nasa takin a rawn danglam ngei bawk ang. Heng thil lo thleng tur hi engtin nge kan hmachhawn ang tih hi kan ngaihtuah a ngai ta hle mai.
Tuna kan tui hna te hi theihtawp in humhal ila, ram vak thin te pawhin chawlhsan zai rel ve tawh se. Thingphun ringawt ah duh tawk lo ila, a enkawl kawngah tan kan lak a ngai hle ang. Kumin kum lokal turah hian pawl leh mimal ang pawhin thingphun i uar sauh sauh ang u.
Post a Comment