Lawngtlai 02.07.2024 : Nimin khan Lai Autonomous District Council hnuaia 12-Lawngtlai Chandmary MDC Constituency seat ruak hnawh khah nana By-election buatsahih vote tlate chu Lawngtlai District Deputy Commissioner Office complex-a counting hall ruahmanah chhiar a ni a. Pu C.Lalsawmzuala, MNF party Candidate chu tling a puan a ni.
12-Lawngtlai Chandmary MDC Bial by-election hi Dt 27.06.2024 khan Vote hi thlak a ni a. Vote tla zawng zawng hi 2,798 (mipa 1,313 leh hmeichhia 1,485) atangin Electronic Voting Machine-ah vote 2,014 (mipa 938 leh hmeichhia 1,076) leh postal ballot-ah vote 47, a zavaiin vote 2,061 (73.66%) a tla a ni.
Vote chhiar hi he by-election-a Returning Officer, Lawngtlai District Election Officer Pu Cheemala Siva Gopal Reddy kaihhruaina hnuaiah kalpui niin, dawhkan pali-ah thawh (round) khata chhiar zawh a ni. Ballot paper hmanga Vote tla te chhiar hmasak a ni.
Lawngtlai Chandmary bial MDC By Election ah hian Pu C.Lalsawmzuala, MNF party candidate chuan Vote 1,161 a hmu a, amah hnaih ber tu Pu F.Hrangtukhuma (ZPM) chuan Vote 876 hmu in BJP Party candidate Pu Lalawmpuia chuan Vote 19 a hmu ve thung a. NOTA ah hian Vote 5 tla in, Pu C.Lalsawmzuala hi Vote 285 in amah hnaih bertu Pu F.Hrangtukhuma, ZPM chu a hneh a ni. Returning Officer Pu Cheemala Siva Gopal Reddy chuan Pu C.Lalsawm-zuala, MNF party Candidate chu MDC thar atan thlan tlin a ni tih puangin, thlan tlin a nihna certificate a hlan nghal.
Pu C.Lalsawmzuala chuan, MDC a thlan tlin ani chu lawmawm a tih thu a sawi a. MNF party te leh Congress party te thawhhona tha tak hnuaiah hnehna chu chang anih thu leh party worker-te thawhrimna zawng zawng ah lawmthu a sawi bawk a. ‘Pathian leh kan ram tan’ titute hi mifel awm khawm ni lo mah ila, Lalpa’n min hre reng a, a hunah tak ro min relsak thin a ni, a ti a. LADC a Executive Body chu a nghing dawn lova, nghet taka a kal zel theihna turin hma kan la dawn ani, a ti bawk.
Pu F.Hrangtukhuma, ZPM party Candidate chu lawmthu a sawi bawk a. Chandmary bial chhunga amah duhsaka vote petu zawng zawngte, party workers thawkrim tak tak te leh ZPM party hruaitu Aizawl atanga amah puih tura lokal zawng zawngte chungah lawmthu a sawi bawk a ni. ZPM chu kalphung thar mipui sorkar anihna ang takin Mizoram ah sorkar-na kan siam mek a. Kan Autonomous District Council tan pawh malsawmna a nih zel dawn a ni, a ti bawk.
Tun tum 12-Lawngtlai Chandmary By-election ah hian Political party pali ten Candidate an nei thei a. Mizoram a sorkar-na siam tu ZPM party in Pu F,.Hrangtukhuma an party aiawha dintir a ni a. Central lama sorkar-na siamtu BJP ten Pu K.Lalawmpuia an din tir ve thung a. Lai Autonomous District Council a sorkar-na chelh mektu MNF leh Congress tangkawp ten Pu C.Lalsawm-zuala Candidate atan an nei ve bawk a ni.
Dt 3.July, 2024 hian Lai Autonomous District Council hall-ah rinna thutiam tir a, lakluh ani dawn a ni.
Post a Comment