June 25, 2024 (Rauthla) : Vawiin khan Pu TBC. Lalvenchhunga, ZPM PAC member leh Mizoram sorkara Adviser to CM (Finance) chuan Lawngtlai Press Club-ah Lawngtlaia chanchin thar thehdarhtute kawmin, ZPM sorkar chuan ADC te a duat thu leh tuna MNF leh Congress party thawhdunna chuan rei a daih dawn loh thu a sawi.
Pu TBC. Lalvenchhunga chuan sorkar hmasa lamah ADC ten hmasawnna hnathawh tur chu sawi loh, Council-a an inrelbawlna tur leh hlawh pawh daih mumal lovin an pe thin tih a sawi a, ZPM sorkar hnuah erawh an hlawh tur piah lamah hmasawnna hnathawhna tur vaibelchhe tam tak an pek tel thu a sawi a, hei hian ZPM sorkarin ADC te a ngaihtuah zia a tilang chiang hle a ni, a ti a. Sorkar hmasa lamah state sawrkar chu tlawn ngaiin an awm thin a. ZPM sawrkarah chuan chutiang ngai lo chuan awlsam takin kan pe chhuak nghal a ni, a ti bawk.
Sawrkar hmasain ADC te sum an pek chu vaibelchhe 505.76 a ni a, ZPM sawrkar hnuah ADC te tan sawrkarin vaibelchhe 612.17 kan pe, a ti a. LADC bikah nikum financial year 2023- 2024 ah an budget bakah vaibelchhe 70 zet pek belh an ni a, tun Financial Year ah hian an indaihlohna hi an indaih ngei theihna turin budget-ah dahsak sa an ni, a ti bawk.
Pu TBC. Lalvenchhunga chuan Lawngtlai Chandmary MDC by election lo awm turah MNF leh Congress thawkdun siin, Village Council inthlanna ah erawh an thawkho thei lo hian Party pahnihte thawhdunna chu lalna leh thuneihna duh vang chauh a ni tih a lan fiah tir niin a sawi a. LADC ah MNF 12 leh congress 1 in sawrkarna an siam mek a, tun tum Chandmary bial MDC by-election-ah Congress candidate awm lovin MNF zawkin seat an chang ta a, MNF hian chakna lo chang ta se Congress tel lovin sawrkarna an siam thei dawn ta tihna a ni a, MDC a MNF sawrkar theihna tura by election-a MNF tanpui hi Congress mipuite hian an ba lo, a ti a. Congress mipui te chu ZPM candidate vote pui turin a sawm.
Post a Comment