He hunah hian Lawngtlai District Bawrhsap Pu Cheemala Siva Gopal Reddy chu Khuallian a ni a. Mizo khawtlang nun chu inkaihhruaina fel tak nei sa leh thlahtute aṭanga nun ze mawi, rilru put hmang dik leh nunphung ṭha nena chen hona khawtlang a nih avangin sualna chi hrang hrang hmuh tur awm ve bawk mah se, chu'ng thil ṭha lote chu khawtlangah mikhual leh hnawh kian la harsa lo tak nia a hriat thu a sawi a. Mizo zingah chuan ruihhlo ngaite leh hum sual daite pawh an sual hrim hrim vang ni lovin, duhthlanna an siam sual leh dai sual palh vang a ni fo tih sawiin, ruihhlo duh lohna tak tak thinlung pu-a khawtlangin ṭang ruala kan do chuan ruihhlo awm lohna khawtlang kan din thei ngei ang, a ti.
Khuallian chuan ruihhlo hman sual avangin chhungkaw keh chhiatna, nih tur ang nih phak lohna, chhungkua leh khawtlang boruak ralmuang lo, rukruk, tualthah, hri ṭha lo leh nunna hlu tak channa te a thleng ṭhin tih sawiin, ruihhlo laka invenna lamah nasa taka ṭan lak a ṭul, a ti a. Invenna chu in chhungkhur aṭanga ṭan a pawimawh tiin, chhungkaw tinin mahni fate hnenah ruihhlo ṭhat lohzia zirtir a, a ṭul hunah chuan inthununna khauh tak pawh lek kawh mai a ṭha, a ti a. Pathian thuin, "Mihring tuar theih ang chauh lo chu thlemna reng reng in chungah a thleng ngai lo. Pathian zawng a rinawm a ni, ani chuan in tuar theih tawk aliam chu thlemna in tawh a phal lo vang; in tuar theihna turin thlemna rualin tlan chhuahna kawng a siam nghal zawk ang," a tih angin ruihhlo pawh chu do hneh theih a ni tih sawiin, ruihhlo laka fihlim khawtlang nuam tak siam turin kal khawmte chu mahni zawnah ṭheuh tha thawh turin a chah a ni.
He hun hi Lawngtlai Sub-Divisional Officer (Sadar) Pi Margaret J. Vanlalremmawii chuan kaihruaiin, kal khawmte lawmna thu leh hun hman chhan tlangpui a sawi a. Lawngtlai District Superintendent of Police Pu R. Lokeshwaran pawhin thu sawiin, ruihhlo chu mimal buaina a ni lo va, ram leh khawtlang buaina a ni zawk a, chu vang chuan ṭang ruala buaipui a ṭul a ni, a ti a. Zirlai kal khawmte chu vawiina an duhthlannain an nakin hun a hril dawn avangin rilru fim tak pu-a duh thlang ṭhin tura chahin, hlawhtling tur leh ram leh khawtlang tana chhawr tlak ni tur chuan ruihhlo laka inthiar fihlim a ṭul tih hre reng turin a chah a ni.
He hunah hian LIKBKṬP hnuaia Central Amos Operation (CAO) hruaitu Rbt. HC Lalreia leh Central Young Lai Association hnuaia Drug Reduction Squad (DRS) Secretary Tv. Vanlalzapa te hnen aṭangin ruihhlo dona kawnga CAO leh CYLA DRS hma lakna report ngaihthlak a ni a. Don Bosco School naupangte'n hnam lam (Sarlamkai) entirin, Nl. T. Lalhlimpuii'n zaiin kal khawmte a awi a. Lawngtlai District Information & Public Relations Officer Pu C. Lalhruaitluanga kaihhruaiin kal khawmte chuan ruihhlo dona kawnga ke pen tur leh ruihhlo laka inthiar fihlim tura intiamna (pledge) an chham rual a. DC Office-a Superintendent Pi Malsawmtluangi'n lawm thu sawiin hun a khar a ni.
He hunah hian state sawrkar leh LADC-a official-te, tlawmngai pawl hruaitute, Govt Region Higher Secondary School, Don Bosco School, Jehova Jire HSS leh Harvard Higher Academy zirlai naupangte leh zirtirtute an kal khawm a. Khuallian Lawngtlai District Bawrhsap chuan ruihhlo dona kawnga an hma lak zelna atan CYLA DRS te kutah Nasha Mukt Bharat Abhiyaan aṭangin ₹ 1,00,000/- (cheng nuai khat) a hlan nghal a ni.
Central Amos Operation hi LIKBKṬP hma laknain kum 2022 aṭang khan kalpui niin, ruihhlo ti ṭhinte Pathian thutak hmanga chhan chhuahna kawngah hma an la ṭhin a. Ruihhlo ti ṭhinte'n an sim theih nan Counselling Centre dinin, a la ti lote venna kawngah pawh hma lain, Lai Autonomous District Council (LADC)-a Education Department (Middle School) te nen ṭang tlangin Lawngtlai District chhunga middle school eng emaw zatah ruihhlo ṭhat lohzia zirtirna an kalpui mek bawk.
CYLA DRS hi kum 2022 September ni 2 khan din a ni a. Member 20 awmin, ruihhlo dona kawngah nasa takin hma an la mek a. An din tirh aṭangin ruihhlo zuar leh ngai mi 608 (mipa 561 leh hmeichhia 47) man tawhin, police hnena an hlan chhawn bakah, home-ah te an dah ṭhin a. No. 4 hawng 162 (₹ nuai 156.7 man hu), ganja kg 10 (₹ sing sarih man hu) leh opium kg 5 (₹ nuai 10 man hu) bakah, ruihhlo chi dang ṭhahnem tak an man tawh bawk a ni.
Post a Comment