June 6, 2024 (Rauthla) : Zanin khan YLA Council Veng Branch chuan kumin HSLC leh HSSLC result tihchhuaka an veng chhung atanga zirlai tithate leh hlawhtlingte chawimawina hun neiin, MBBS zir chhuak pakhat chawimawina hun an nei bawk.
LADC Conference Hall-a zirlai tithate leh hlawhtlingte chawimawina hun hman hi YLA Council Veng Branch Vice President Pu Thanchungnunga chuan kaihhruaiin, Adviser Pu B. Lalzarliana'n hunserh hmangin, zirlaite fuihna thu a sawi.
Zanina zirlai tithate leh hlawhtling chawimawite hi HSLC ah zirlai 24 niin, HSSLC ah zirlai 15 niin, an vaiin zirlai 39 an ni a. HSLC ah distinction-a lang zirlai 1 awmin, HSSLC ah zirlai 2 distinction lang an awm bawk. Heng bakah hian MBBS zir chhuak Marina Lalrintluangi chawimawi a ni bawk.
YLA Council Veng Branch President Pu Johnny Zothansanga chuan hmasawn tura mihringte hi Pathianin siamte kan ni a, Pathianin mihring a siam dan leh Education hi a inmil hle. Zirna hi insenso na mai mai a ni a, hnathawh tur a vang bawk nen, zir san a ngai lo kan ti thin. A dikna chin awm ve mahse, a tam zawkah a dik lo. Zirsanna hi sorkar hnathawh lam a ni lo, mihringte hi mi pangngaiah min chhuah a, mihring puitlingah min siam thin. Zirlainaah quality a pawimawh a, mi kawih kur sa thei lo mai lovin, mahniin thei lawh kan tum tur a ni, a ti.
Council Veng VCP Pu T. Rosangpuia chuan, YLA ten zirlai tithate leh hlawhtlingte chawimawina hun an buatsaih chu lawmawm a tih thu a sawi a. Council Vengah zirlai hlawhtling an pung zel chu Pathian malsawmna an dawn nasa tak a nih thu a sawi. Kan fate zirna kalzelah nu leh pate hian mawh kan phur nasa hle a, zirlai naupangte an zirna kawngaah pressure pek vak hi a sawt lova, an duhthlanna kan zahsak a pawimawh a ni, a ti. Eng kawng pawh zawh dawn ila, zirna atang lo chuan hlawhtlinna a awm loh thu sawiin, hlawhtling tur chuan tumruhna leh taihmakna neih a ngaih thu a sawi.
Zanin hun hmannaah hian Francis Hc. Zorammuana leh Chunglianbika ten zaiin mipui kalkhawm an awi a. Pu S. Lalnunkima, Asst. Secretary, YLA Council Veng Branch-in lawmthu sawina a nei bawk.
Post a Comment