June 13, 04, Lawngtlai : Vawiin khan Power & Electricity Department buatsaihin P&E Lawngtlai Division Office-ah Mizoram chhimlam in kawlpheta mumal leh tha zawk an neih theih nana hmalakna kalmek leh hmalak dan turah inrawnkhawmna neih a ni.
Er. Lalrinmawia Superintending Engineer, Lunglei Power Circle hova inrawnkhawmna neihah hian Lawngtlaia tlawmngai pawl hrang hrang, Central YLA, Lai Women Association, MHIP, Mizoram Upa Pawl, Lai Students Association, Lawngtlai District Students Association leh Mizoram Journalist Association Lawngtlai District aiawh te an tel.
Vawiin Inrawnkhawmnaah hian chhimlam, a bikin Lawngtlai leh Siaha District chawm tura hmalakna kal mek, Khawiva leh Lawngtlai inkara power line awmsa 132KV line a tilian tura hmachhawp awm mekah, hnathawh a nih tak tak hunah mipui tawrhna thlen tlem zawnga hnathawh a nih theih dan tur te sawiho niin, chhun lamah karkhatah ni thum / ni li chhung emaw kawlphetha titawpa hnathawh nise, zan lamah eng pek ni thin se tiin ngaihdan thawhkhawm a ni a, P&E Department lam ten lo zirchiangin hna chak zawk, mipui tawrhna thlen tam lo deuh zawnga thawh dan kawng lo dapse an ti.
Lawngtlai bul Chawnhuah 132Kv Sub Station bun mek pawh kumin chhungin zawh fel hman beisei niin, helai thlunzawm tur hian Khawiva atanga power lakna chu tihchangtlun chhoh ngai a ni a, hna hi thawh tak tak a nih hun chuan engemawchen chu Lawngtlai leh Siaha District ah kawlphetha khaihlak a awm thin dawn a, inrawnkhawmna a telte chuan thiltha zawk an neih theihna tur a nih chuan mipui tawrhna chu thleng lo thei lo a nih thu leh hetiang hun a thlen pawn an tana tha tur a ni tih mipuiin an hriatthiam tur thu an sawi.
Post a Comment