June 12, 2024 (Rauthla) : Zoramthar pawl hotupa Rev. Dr. Zaichhawna Hlawndo chuan Zoramthar chu he khawvel rorelna Democrary-ah a innghat lo tih sawiin, Pathian Lalram Theocracy-ah a in nghat zawk tih a sawi.
Vawiina Lawngtlai Press Club-a chanchinthar lakhawmtute a kawmmnaah Rev. Dr. Zaichhawna Hlawndo chuan Myanmar lam Zofate dinhmun te, Manipur lam kan unaute dinhmun te leh Mizoram politic boruak thlirin Zoramthar pian chu a hlat tawh loh thu a sawi a. Zoramthar lo piang tur chu Pathianin engkim a ruahman fel vek tawh a, Mizo hnahthlak hnam hrang hrangte Zofa kan nih kan in hriat vek hunah leh kan in pawm tlan vek hunah kan chenna chu Zoram a nih chauh tur thu a sawi. Hnam hrang hrang te te a kan awm chhung chuan Independent nation kan nih theih loh tur thu a sawi.
Rev. Dr. Zaichhawna Hlawndo chuan Zofa hnam hrang hrangte huapzo tur Zofate Pathian Biak Inpui sa tura ruahmanna an neh mek thu a sawi a. Hei hi Pathianin a ruahman lawk a nih thu leh Pu Zaichhawna vision a nih loh thu a sawi. Zofate Pathian Biak chu Zoramthar ta ni lovin, Zofa zawng zawngte ta a nih thu a sawi bawk.
Rev. Dr. Zaichhawna sawi danin, Zofate Pathian Biak Inpui hi 23809.52 square metre (Bigha 17.79) niin khawvela biak in lian ber a ni ang. Tuna khawvela biak in lian ber St. Peter’s Basilica hi 23000 square metre niin, Zofate Pathian Biak Inpui hi 809.52 square metre in a lian zawk ang. Kawngkhar 12 leh pindan 12 a awm ang. Heng kawngkhar leh pindan hian Bible thawnthu lemziak hmangin a hril ang. Chung te chu (1) Thilsiam (2) Eden (3) Noah (4) Abrahama (5) Zawlnei (6) Bethlehem (7) Isua Krista (8) Kraws (9) Thawhlehna (10) Tirhkoh Paula (11) Zirtirte leh (12) Damna kawngkhar leh pindan te an ni ang.
Khawvela Biak In lian ber a ni ang a. Biakin chhungah mihring ṭhutna 30,000 bakah a compound-ah nen, a chhung leh pawnah mihring 70,000 lenna tur a ni. A zau zawng hifeet 270 hawlh tlang a ni ang a. Lamtual zau zawng hifeet 80 hawlh tlang a ni ang. A san zawng hifeet 177 a ni ang a. A sakna senso (estimate) hi nuai singkhat vel a ni a. A hmun hi Kanan Phaipui, Kanan Veng, Thenzawl a ni.
Chanchinṭha hrilna hmunpui (Global Mission Centre) a ni ang a. Kohhran pawl hrang hrangin inkhawmpui nan an hmang thei ang. Thlarau, rilru leh taksa dam nana ṭawngṭaina hmunpui a ni ang. Pathian fak leh chawimawina inkhawmna hmunpui (Worship Centre) a ni ang. Khualzin hiptu (tourist attraction) hmun pawimawh tak a ni ang.
Zoramthar hian tunlai hian Mizoram District hrang hrangah Zofate Pathian Biak Inpui sakna tur thawhlawm an khawn mek a, vawiin hian Areopagi, Lawngtlaiah thawhlawm khawnna hun hi an hmang ang.
Post a Comment