June 26, 2024 (Rauthla) : Lawngtlai West bialtu MLA Pu C. Ngunlianchunga chuan date 25th June, 2024 a Lawngtlai Press Club a Mizoram Sorkara mi pawimawh tak Pu TBC Lalvenchhunga MLA, Chief Minister Finance Adviser ni bawkin Lairam mipuite thu dik tawk lo leh rintlak loh a hrilh chungchang chu sawifiah a tha nia a hriat thu sawiin, tun hnu ah chuan ZPM sorkar a mi pawi mawh tak Chief Minister Finance Adviser ber Pu TBC Lalvenchhunga hian hetianga thu dik lo mipui hmaa sawi a chin hi ban san hram turin ka ngen a ni, a ti.
Pu C. Ngunlianchunga chuan Press Conference a neihnaa a sawi sorkar hmasa lo kal tawh zawng zawng ten ADC te duhsak lo leh, hnathawhna leh thawktu hlawh indaih pawha pe lo anga a sawi leh ZPM sorkarin ADC te hi duhsak bik anga a sawi ta mai kha ADC mipuite leh a bik takin Lairam mipuite zahlohna leh bum tumna niin a lang a. VC leh MDC by election kan neih dawn avanga hetianga thu dik lo vote zawn nana a sawi duh mai hi a pawiin a lungchiatthlak hle zawk a ni, a ti.
Lawngtlai West bialtu MLA chuan ZPM sorkarin ADC te sum ti pung a, sum tam tham tak pe anga a sawi chu Chief Minister Finance Adviser meuh hian a hrechiang lo niin a lan thu a sawi a. ZPM sorkar pek ni loin 2nd Mizoram State Finance Commission in a lo ruahman sak, ADC te chanvo liau liau a ni tih hi lo hria se ka ti a ni, a ti.
State Finance Commission hian ADC te chauh ni loin, Aizawl Municipal Corporation, Lunglei Municipal Council, Local Council leh Village Council te sum chan tur pawh a ruahman a ni a, chutiang chiah chuan ADC te chan tur pawh hi ZPM sorkarin a pek thur thur ni loin, State Finance Commission pahnihna in a pek a ni zawk e. Hei hi a hrechiang duh a nih pawhin REPORT OF THE SECOND STATE FINANCE COMMISSION MIZORAM 2021-22 TO 2025-26 ah khan phek number 285 leh a bul vel kha keu sela chiang takin a inziak a ni. Sorkar a Chief Minister Finance Adviser berin ADC te sum pek dan kalphung pawh a lo hre chiang lo a, ZPM sorkarin a pek thur thur anga a sawi leh ta tlat hi thil mak tak, an kalphung thar an sawi fo hi a mi ni zawk? A nihna takah chuan State Finance Commission Recommendation ah chuan Rs. 24657.31 Lakh a nih laiin, ZPM sorkar hian kumin LADC sum hman torah hian Rs. 24539.91 Lakh min pe a, min pek kim duh lohna hi Rs. 117.4 Lakh lai a ni zawk a ni. Tin, he State Finance Commission pawh hi sorkar hmasa din a ni a, an report pawh hi 20th July, 2023 ah Mizoram sorkar ah na pe daih tawh zawk a ni tih kan hriat tlan a tha awm e. Chuvangin LADC mipuite chanai pawh min pe kim duh lo tu ZPM sorkar hian ADC te hmangaih thar leh duhsak viau angin in sawi tawh lo turin ka ngen a ni, a ti.
Pu C. Ngunlianchunga chuan ZPM hotute ka ngen duh chu, mipui hnenah hian mipui vote duh avang leh midangte aia tha bik niawm tak anga in lantir duhna avang hian mipui hmaah hian thu belhchian dawl lo leh thu dik ni si lo, a dikna lang chhuak leh nghal mai tur ang hi tlawmngai hlawm sela sawi tawh lo turin ka ngen tak meuh a, MLA election hmaa sorkar kalpui tura mipuia an intiam ang khan sorkar hi kaihhruai zawk rawh se tiin ka chah nawn leh a ni, a ti.
Post a Comment